[160] Nāgassa bhūmīti yattha sakkā hatthiṃ abhirūḷhena gantuṃ, ayaṃ nāgassa bhūmi nāma. Nāgā paccorohitvāti vihārassa bahidvārakoṭṭhake hatthito orohitvā. Bhūmiyaṃ patiṭṭhitasamakālameva pana bhagavato tejo rañño sarīraṃ phari. Athassa tāvadeva sakalasarīrato sedā mucciṃsu, sāṭakā pīḷetvā apanetabbā viya ahesuṃ. Attano aparādhaṃ saritvā mahābhayaṃ uppajji. So ujukaṃ bhagavato santikaṃ gantuṃ asakkonto jīvakaṃ hatthe gahetvā ārāmacārikañcaramāno viya "idaṃ te samma jīvaka suṭṭhu kāritaṃ, idaṃ suṭṭhu kāritan"ti vihārassa vaṇṇaṃ bhaṇamāno anukkamena yena maṇḍalamāḷassa dvāraṃ tenupasaṅkami, sampattoti attho.

"kahaṃ pana sammā"ti kasmā pucchati. Eke tāva "ajānanto"ti vadanti. Iminā kira daharakāle pitarā saddhiṃ āgamma bhagavā diṭṭhapubbo, pacchā pana pāpamittasaṃsaggena pitughātaṃ katvā abhimāre pesetvā dhanapālaṃ muñcāpetvā mahāparādho hutvā bhagavato sammukhībhāvaṃ na upagatapubboti asañjānanto pucchatīti. Taṃ akāraṇaṃ. Bhagavā hi ākiṇṇavaralakkhaṇo anubyañjana- paṭimaṇḍito chabbaṇṇarasmīhi sakalaṃ ārāmaṃ obhāsetvā tārāgaṇaparivuto viya puṇṇacando bhikkhugaṇaparivuto maṇḍalamāḷamajjhe nisinno, taṃ ko na jāneyya. Ayaṃ pana attano issariyalīḷāya pucchati. Pakatihesā rājakulānaṃ, yaṃ jānantāpi ajānantā viya pucchanti. Jīvako pana taṃ sutvā "ayaṃ rājā paṭhaviyaṃ ṭhatvā `kuhiṃ paṭhavīti, nabhaṃ oloketvā `kuhiṃ candimasuriyāti, sinerumūle ṭhatvā `kuhiṃ sinerū"ti vadamāno viya dasabalassa puratova ṭhatvā "kuhiṃ bhagavā"ti pucchati. "handassa

@5 Ma. pamuñcāpetvā 6 Sī., i. issariyalīḷhāya 7 ka. jānantāpi ajānantāpi,