@Sī. jānentāpi ajānantā viya, i. sañjānantāpi ajānantā viya Bhagavantaṃ dassessāmī"ti cintetvā yena bhagavā tenañjaliṃ paṇāmetvā "eso mahārājā"tiādimāha. Purakkhatoti parivāretvā nisinnassa purato nisinno.

[161] Yena bhagavā tenupasaṅkamīti yattha bhagavā, tattha bhagavato santikaṃ upasaṅkamantoti attho. Ekamantaṃ aṭṭhāsīti bhagavantaṃ vā bhikkhusaṃghaṃ vā asaṃghaṭṭayamāno attano ṭhātuṃ anucchavike ekasmiṃ padese bhagavantaṃ abhivādetvā ekova aṭṭhāsi. Tuṇhībhūtaṃ tuṇhībhūtanti yato yato anuviloketi, tato tato tuṇhībhūtamevāti attho. Tattha hi ekabhikkhussāpi hatthakukkuccaṃ vā pādakukkuccaṃ vā khipitasaddo vā natthi, sabbālaṅkārapaṭimaṇḍitaṃ nāṭakaparivāraṃ bhagavato purato ṭhitaṃ rājānaṃ vā rājaparisaṃ vā ekabhikkhupi na olokesi. Sabbe bhagavantaṃyeva olokayamānā nisīdiṃsu.

Rājā tesaṃ upasame pasīditvā vigatapaṅkatāya vippasannarahadamiva upasantindriyaṃ bhikkhusaṃghaṃ punappunaṃ anuviloketvā udānaṃ udānesi. Tattha imināti yena kāyikena ca vācasikena ca mānasikena ca sīlūpasamena bhikkhusaṃgho upasanto, iminā upasamenāti dīpeti. Tattha "aho vata me putto pabbajitvā ime bhikkhū viya upasanto bhaveyyā"ti na idaṃ sandhāya esa evamāha. Ayaṃ pana bhikkhusaṃghaṃ disvā pasanno puttaṃ anussari. Dullabhaṃ hi laddhā acchariyaṃ vā disvā piyānaṃ ñātimittādīnaṃ anussaraṇaṃ nāma lokassa pakatiyeva. Iti bhikkhusaṃghaṃ disvā puttaṃ anussaramāno esa evamāha.

Apica putte āsaṅkāya tassa upasamaṃ icchamānopesa evamāha. Evaṃ kirassa ahosi, putto me pucchissati "mayhaṃ pitā daharo, ayyako me kuhin"ti. So "pitarā te ghātito"ti sutvā "ahaṃ pitaraṃ ghātetvā rajjaṃ kāressāmī"ti maññissati. Iti putte āsaṅkāya tassa upasamaṃ icchamānopesa evamāha. Kiñcāpi hi esa evamāha. Athakho naṃ putto ghātessatiyeva. Tasmiṃ hi vaṃse pituvadho pañcaparivaṭṭe gato. Ajātasattu bimbisāraṃ ghātesi, udayo ajātasattuṃ, tassa