@5 ka. viloketvā 6 Sī.,ī. ghātesiyeva 7 cha.Ma. pañcaparivaṭṭo Putto mahāmuṇḍiko nāma udayaṃ, tassa putto anuruddho nāma mahāmuṇḍikaṃ, tassa putto nāgadāso nāma anuruddhaṃ. Nāgadāsaṃ pana "vaṃsacchedakarājāno ime, kiṃ imehī"ti raṭṭhavāsino kupitā ghātesuṃ.

"āgamā kho tvan"ti kasmā evamāha? bhagavā kira raññā Vacībhede akateyeva cintesi "ayaṃ rājā āgantvā tuṇhī niravo ṭhito, kinnukho cintesī"ti athassa cittaṃ ñatvā "ayaṃ mayā saddhiṃ sallapituṃ asakkonto bhikkhusaṃghaṃ anuviloketvā puttaṃ anussari, na kho panāyaṃ mayi anālapante kiñci kathetuṃ sakkhissati, karomi tena saddhiṃ kathāsallāpan"ti tasmā rañño vacanāntaraṃ "āgamā kho tvaṃ mahārāja yathāpeman"tiādimāha, tassattho:- mahārāja yathā nāma unname vuṭṭhaṃ udakaṃ yena ninnaṃ tena gacchati, evameva tvaṃ bhikkhusaṃghaṃ anuviloketvā yena pemaṃ tena gatoti.

Atha rañño etadahosi "aho acchariyā buddhaguṇā, mayā sadiso bhagavato aparādhakārako nāma natthi, mayā hissa aggupaṭṭhāko ghātito, devadattassa ca kathaṃ gahetvā abhimārā pesitā, nāḷāgiri mutto, maṃ nissāya devadattena silā paviddhā, evaṃ mahāparādhaṃ nāma maṃ ālapato dasabalassa mukhaṃ nappahoti, aho bhagavā pañcahākārehi tādilakkhaṇe suppatiṭṭhito, evarūpaṃ nāma satthāraṃ pahāya bahiddhā na pariyesissāmā"ti so somanassajāto bhagavantaṃ ālapanto "piyo me bhante"tiādimāha.