sabbaññuppavāraṇaṃ pavāresi.

[163] Evaṃ bhagavatā sabbaññuppavāraṇāya pavāritāya attamano rājā pañhaṃ pucchanto "yathā nukho imāni bhante"tiādimāha. Tattha sippameva sippāyatanaṃ. Puthusippāyatanānīti bahūni sippāni. Seyyathīdanti katame pana te. "hatthārohā"ti ādīhi ye taṃ taṃ sippaṃ nissāya jīvanti, te dīpeti. Ayaṃ hissādhippāyo:- "yathā imesaṃ sippupajīvīnaṃ taṃ taṃ sippaṃ nissāya sandiṭṭhikaṃ sippaphalaṃ paññāyati, sakkā nu kho bhante evameva diṭṭheva dhamme sandiṭṭhikaṃ sāmaññaphalaṃ paññāpetun"ti tasmā sippāyatanāni ārabhitvā sippupajīvino dasseti.

Tattha hatthārohāti sabbepi hatthācariyahatthivejjahatthibandhādayo dasseti. Assārohāti sabbepi assācariyaassavejjaassabandhādayo. Rathikāti sabbepi rathācariyarathayodharatharakkhādayo. Dhanuggahāti dhanuācariyā issāsā. Celakāti ye yuddhe jayaddhajaṃ gahetvā purato gacchanti. Calakāti "idha rañño ṭhānaṃ hotu, idha asukamahāmattassā"ti evaṃ senābyūhakārakā. Piṇḍadāyakāti sāhasikamahāyodhā. Te kira parasenaṃ pavisitvā parasīsaṃ piṇḍamiva chetvā chetvā nayanti uppatitvā uppatitvā nigacchantīti attho. Ye vā saṅgāmamajjhe yodhānaṃ bhattapātiṃ gahetvā parivisanti, tesampetaṃ nāmaṃ. Uggā ca rājaputtāti uggatuggatā saṅgāmāvacarā rājaputtā. Pakkhandinoti ye "kassaci sīsaṃ vā āvudhaṃ vā āharāmā"ti vatvā