[164] Tattha abhijānāsi no tvanti abhijānāsi nu tvaṃ. Ayañca nosaddo parato "pucchitā"ti padena yojetabbo. Idaṃ hi vuttaṃ hoti "mahārāja tvaṃ imaṃ pañhaṃ aññe samaṇabrāhmaṇe pucchitā nu, abhijānāsi ca naṃ puṭṭhabhāvaṃ, na te sammuṭṭhan"ti. Sace te agarūti sace tuyhaṃ yathā te te byākariṃsu, tathā idha bhāsituṃ bhāriyaṃ na hoti, yadi na koci aphāsukabhāvo atthi, bhāsassūti attho. Na kho me bhanteti kiṃ sandhāyāha. Paṇḍitapaṭirūpakānañhi santike kathetuṃ dukkhaṃ hoti, te pade pade akkhare akkhare dosameva denti. Ekantapaṇḍitā pana kathaṃ sutvā sukathitaṃ pasaṃsanti, dukkathitesu pālipadaatthabyañjanesu yaṃ yaṃ virujjhati, taṃ taṃ ujuṃ katvā denti. Bhagavatā ca sadiso ekantapaṇḍito nāma natthi. Tenāha "nakho me bhante garu, yatthassa bhagavā nisinno, bhagavantarūpovā"ti.

Pūraṇakassapavādavaṇṇanā

[165] Ekamidāhanti ekaṃ idha ahaṃ. Sammodanīyaṃ kathaṃ sāraṇīyaṃ vītisāretvāti sammodajanakaṃ saritabbayuttakaṃ kathaṃ pariyosāpetvā.

[166] Karoto kho mahārāja kārayatotiādīsu karatoti sahatthā karontassa. Kārayatoti āṇattiyā kārentassa. Chindatoti paresaṃ hatthādīni chindantassa. Pacatoti daṇḍena pīḷentassa tajjentassa vā. Socayatoti parassa bhaṇḍaharaṇādīhi socayato. Socāpayatoti sokaṃ sayaṃ karontassāpi parehi kārāpentassāpi. Kilamatoti āhārupacchedabandhanāgārappavesanādīhi sayaṃ