[183] Yathā te khameyyāti yathā te rucceyya. Dāsoti antojāta dhanakkīta karamarānīta sāmaṃdāsabyaupagatānaṃ aññataro. Kammakāroti analaso kammakaraṇasīloyeva. Dūrato disvā paṭhamameva uṭṭhahatīti pubbuṭṭhāyī. Evaṃ uṭṭhito sāmino āsanaṃ paññapetvā pādadhovanādikattabbakiccaṃ katvā pacchā nipatati seyyaṃ kappetīti pacchānipātī. Sāmikamhi vā sayanato avuṭṭhite pubbeyeva vuṭṭhātīti pubbuṭṭhāyī. Paccūsakālato paṭṭhāya yāva sāmino rattiṃ niddokkamanaṃ, tāva sabbakiccāni katvā pacchā nipatati seyyaṃ kappetīti pacchānipātī. "kiṃ karomi, kiṃ karomī"ti evaṃ kiṃkārameva paṭisuṇanto vicaratīti kiṃkārapaṭissāvī. Manāpaṃyeva kiriyaṃ karotīti manāpacārī. Piyameva vadatīti piyavādī. Sāmino tuṭṭhapahaṭṭhaṃ mukhaṃ ullokayamāno vicaratīti mukhamullokiko.

Devo maññeti devo viya. So vatassāhaṃ puññāni kareyyanti so vata ahaṃpi evarūpo assaṃ, yadi puññāni kareyyanti attho. "so vatassāyan"tipi pāṭho, ayamevattho. Yannūnāhanti sace dānaṃ dassāmi, yaṃ rājā ekadivasaṃ deti, tato satabhāgaṃpi yāvajīvaṃpi na sakkhissāmi dātunti pabbajjāyaṃ ussāhaṃ katvā evaṃ cintanabhāvaṃ dasseti.

Kāyeṇa saṃvutoti kāyena pihito hutvā akusalassa pavesanadvāraṃ thaketvāti attho. Eseva nayo sesapadadvayepi. Ghāsacchādanaparamatāyāti ghāsacchādanena paramatāya uttamatāya, etadatthaṃpi anesanaṃ pahāya aggasallekhena