@3 cha.Ma. vatassassantipi 4 i. pabbajjāya Santuṭṭhoti attho. Abhirato paviveketi "kāyaviveko ca vūpakaṭṭhakāyānaṃ nekkhammābhiratānaṃ, cittaviveko ca parisuddhacittānaṃ paramavodānappattānaṃ, upadhiviveko ca nirupadhīnaṃ puggalānaṃ visaṅkhāragatānanti evaṃ vutte tividhepi viveke rato gaṇasaṅgaṇikaṃ pahāya kāyena eko viharati, cittakilesasaṅgaṇikaṃ pahāya aṭṭhasamāpattivasena eko viharati, phalasamāpattiṃ vā nirodhasamāpattiṃ vā pavisitvā nibbānaṃ patvā viharatīti attho. Yaggheti codanaṭṭhe nipāto.

[184] Āsanenapi nimanteyyāmāti nisinnāsanaṃ papphoṭetvā "idha nisīdathā"ti vadeyyāma. Abhinimanteyyāmapi nanti abhinīharitvāpi naṃ nimanteyyāma tattha duvidho abhihāro vācāya ceva kāyena ca. "tumhākaṃ icchiticchitakkhaṇe amhākaṃ cīvarādīhi vadeyyātha, yena attho"ti vadantohi vācāya abhiharitvā nimanteti nāma. Cīvarādivekallaṃ sallakkhetvā "idaṃ gaṇhathā"ti tāni dento pana kāyena abhiharitvā nimanteti nāma. Tadubhayampi sandhāya "abhinimanteyyāmapi nan"ti āha. Ettha ca gilānapaccayabhesajjaparikkhāroti yaṃkiñci gilānassa sappāyaṃ osathaṃ. Vacanaṭṭho pana visuddhimagge vutto. Rakkhāvaraṇaguttinti rakkhāsaṅkhātañceva āvaraṇasaṅkhātañca guttiṃ. Sā panesā na āvudhahatthe purise ṭhapentena dhammikā nāma saṃvidahitā hoti. Yathā pana avelāya kaṭṭhahārikapaṇṇahārikādayo vihāraṃ na pavisanti, migaluddakādayo vihārasīmāya mige vā macche vā na gaṇhanti, evaṃ saṃvidahantena dhammikā nāma saṃvidahitā honti, taṃ sandhāyāha "dhammikan"ti.

[185] Yadi evaṃ santeti yadi tava dāso tuyhaṃ santikā abhivādanādīni labheyya, evaṃ sante. Addhāti ekaṃsavacanametaṃ. Paṭhamanti gaṇhanto aññassāpi aññassāpi atthitaṃ dīpeti, teneva ca rājā "sakkā pana bhante aññaṃpī"ti ādimāha.