[186] Kasatīti kassako. Gehassa pati ekagehamatte jeṭṭhakoti gahapatiko. Balisaṅkhātaṃ karaṃ karotīti karakārako. Dhaññarāsiṃ, dhanarāsiñca vaḍḍhetīti rāsivaḍḍhako.

Appaṃ vāti parittaṃ vā antamaso taṇḍulanāḷimattakaṃpi. Bhogakkhandhanti bhogarāsiṃ. Mahantaṃ vāti vipulaṃ vā. Yathā hi mahantaṃ pahāya pabbajituṃ dukkaraṃ, evaṃ appaṃpīti dassanatthaṃ ubhayamāha. Dāsavāre pana yasmā dāso attanopi anissaro, pageva bhogānaṃ. Yaṃ hi tassa dhanaṃ, taṃ sāmikānaññeva hoti, tasmā bhogaggahaṇaṃ na kataṃ. Ñātiyeva ñātiparivaṭṭo.

Paṇītatarasāmaññaphalavaṇṇanā

[189] Sakkā pana bhante aññaṃpi diṭṭheva dhammeti idha "evamevā"ti na vuttaṃ. Taṃ kasmāti ce? "evamevā"ti hi vuccamāne pahoti bhagavā sakalaṃpi rattindivaṃ tato vā bhiyyopi evarūpāhi upamāhi sāmaññaphalaṃ dīpetuṃ. Tattha kiñcāpi etassa bhagavato vacanasavane pariyatti nāma natthi, tathāpi attho tādisoyeva bhavissatīti cintetvā uparivisesaṃ pucchanto "evamevā"ti avatvā uttariṃ "abhikkantatarañca paṇītatarañcā"ti āha. Tattha abhikkantataranti abhimanāpataraṃ, atiseṭṭhataranti attho. Paṇītataranti uttamataraṃ. Tenahīti uyyojanaṭṭhe nipāto. Savane uyyojento hi naṃ evamāha. Suṇāhīti abhikkantatarañca paṇītatarañca sāmaññaphalaṃ suṇāhi.