"sādhu dhammarucī rājā sādhu paññāṇavā naro.

Sādhu mittānamaddubbho pāpassākaraṇaṃ sukhan"ti

ādīsu sundare. "tenahi brāhmaṇa suṇāhi sādhukaṃ manasi karohī"ti ādīsu sādhukasaddoyeva daḷhīkamme, āṇattiyantipi vuccati. Idhāpi ayaṃ ettheva daḷhīkamme ca āṇattiyañca attho veditabbo. Sundarepi vaṭṭati. Daḷhīkammaṭṭhena hi daḷhamimaṃ dhammaṃ suṇāhi sugahitaṃ gaṇhanto. Āṇattiaṭṭhena mama āṇattiyā suṇāhi, sundaraṭṭhena sundaramimaṃ bhaddakaṃ dhammaṃ suṇāhīti evaṃ dīpitaṃ hoti.

Manasikarohīti āvajja, samannāharāhīti attho, avikkhittacitto hutvā nisāmehi citte karohīti adhippāyo. Apicettha suṇāhīti sotindriyavikkhepanivāraṇametaṃ. Sādhubhaṃ manasikarohīti manasikāre daḷhīkammaniyojanena manindriyavikkhepanivāraṇaṃ. Purimañcettha byañjanavipallāsaggāhanivāraṇaṃ. Pacchimaṃ atthavipallāsaggāhanivāraṇaṃ. Purimena ca dhammassavane niyojeti, pacchimena sutānaṃ dhammānaṃ dhāraṇūpaparikkhādīsu. Purimena ca sabyañjano ayaṃ dhammo, tasmā savanīyoti dīpeti. Pacchimena sāttho, tasmā sādhukaṃ manasikātabboti. Sādhukapadaṃ vā ubhayapadehi yojetvā kātabbaṃ. Yasmā ayaṃ dhammo dhammagambhīro ceva desanā gambhīro ca, tasmā suṇāhi sādhukaṃ, yasmā atthagambhīro ca paṭivedhagambhīro ca, tasmā sādhukaṃ manasikarohīti evaṃ yojanā veditabbā. Bhāsissāmīti "sakkā mahārājā"ti evaṃ paṭiññātasāmaññaphaladesanaṃ vitthārato bhāsissāmi. Desessāmīti hi saṅkhittadīpanaṃ hoti. Bhāsissāmīti vitthāradīpanaṃ. Tenāha vaṅgīsatthero:-