avīcimanusambandho nadīsotova vattatīti. Evaṃ abhikkamādīsu asammuyhanaṃ asammohasampajaññaṃ nāmāti.

Niṭṭhito "abhikkante paṭikkante sampajānakārī hotī"ti padassa attho.

Ālokite vilokiteti ettha pana ālokitaṃ nāma purato pekkhanaṃ. Vilokitaṃ nāma anudisāpekkhanaṃ. Aññānipi heṭṭhā upari pacchato pekkhanavasena olokitaullokitavilokitāni nāma honti, tāni idha na gahitāni. Sāruppavasena pana imāneva dve gahitāni, iti iminā vā mukhena sabbānipi tāni gahitānevāti.

Tattha "ālokessāmī"ti citte uppanne cittavaseneva anoloketvā atthapariggaṇhaṇaṃ sātthakasampajaññaṃ, taṃ āyasmantaṃ nandaṃ kāyasakkhiṃ katvā veditabbaṃ. Vuttañhetaṃ bhagavatā "sace bhikkhave nandassa puratthimā disā āloketabbā hoti, sabbaṃ cetaso samannāharitvā nando puratthimadisaṃ āloketi `evamme puratthimadisaṃ ālokayato na abhijjhādomanassā pāpakā akusalā dhammā anvāssavissantī'ti iti sātthakasampajāno hoti. Sace bhikkhave nandassa pacchimā disā .pe. Uttarā disā .pe. Dakkhiṇā disā .pe. Uddhaṃ .pe. Adho .pe. Anudisā anuviloketabbā honti, sabbaṃ cetaso samannāharitvā nando anudisaṃ anuviloketi "evamme anusadisaṃ anuvilokayato na abhijjhādomanassā pāpakā akusalā dhammā anvāssavissantī'ti, itiha tattha sampajāno hotī"ti.