Yaṃ pana parinibbānakāle abhāsi "handadāni bhikkhave āmantayāmi vo, vayadhammā saṅkhārā, appamādena sampādethā"ti idaṃ pacchimabuddhavacanaṃ. Ubhinnamantare yaṃ vuttaṃ, etaṃ majjhimabuddhavacanaṃ nāma. Evaṃ paṭhamamajjhimapacchima- buddhavacanavasena tividhaṃ.

Kathaṃ piṭakavasena tividhaṃ? sabbampi cetaṃ vinayapiṭakaṃ suttantapiṭakaṃ Abhidhammapiṭakanti tippabhedameva hoti. Tattha paṭhamasaṅgītiyaṃ saṅgītañca anusaṅgītañca sabbampi samodhānetvā ubhayāni pātimokkhāni dve vibhaṅgā dvāvīsati khandhakā soḷasa parivārāti idaṃ vinayapiṭakaṃ nāma. Brahmajālādicatuttiṃsasuttasaṅgaho dīghanikāyo mūlapariyāyasuttādidiyaḍḍhasatadvesuttasaṅgaho majjhimanikāyo oghataraṇasuttādisattasuttasahassasattasatadvāsaṭṭhisuttasaṅgaho saṃyuttanikāyo cittapariyādānasuttādinavasuttasahassapañcasatasuttapaññāsasuttasaṅho aṅguttaranikāyo khuddakapāṭhadhammapadaudānaitivuttakasuttanipātavimānavatthupetavatthutheragāthā- therīgāthājātakaniddesapaṭisambhidāmaggaapadānabuddhavaṃsacariyāpiṭakavasena paṇṇarasappabhedo khuddakanikāyoti idaṃ suttantapiṭakaṃ nāma. Dhammasaṅgaṇi vibhaṅgo dhātukathā puggalapaññatti kathāvatthu yamakaṃ paṭṭhānanti idaṃ abhidhammapiṭakaṃ nāma. Tattha

vividhavisesanayattā vinayanato ceva kāyavācānaṃ

vinayatthavidūhi ayaṃ vinayo vinayoti akkhāto.