Tasmā taṃ "kusalan"ti vacanamupādāya so padeso "kosalā"ti vuccatīti.

Cārikañcaramānoti addhānagamanaṃ gacchanto. Cārikā ca nāmesā bhagavato duvidhā hoti turitacārikā ca aturitacārikā ca. Tattha dūrepi bodhaneyyapuggalaṃ disvā tassa bodhanatthāya sahasā gamanaṃ turitacārikā nāma, sā mahākassapassa paccuggamanādīsu daṭṭhabbā. Bhagavā hi mahākassapassa paccuggamanaṃ karonto muhuttena tigāvutaṃ maggaṃ agamāsi. Āḷavakassatthāya tiṃsayojanaṃ, tathā aṅgulimālassa. Pukkusātissa pana pañcacattālīsayojanaṃ. Mahākappinassa vīsayojanasataṃ. Dhaniyassatthāya sattayojanasatāni agamāsi. Dhammasenāpatino saddhivihārikassa vanavāsissa vanavāsissa tissasāmaṇerassa tigāvutādhikaṃ vīsatiyojanasataṃ.

@4 cha.Ma. mahākassapattheraṃ paccuggacchanto