Assosīti suṇi upalabhi, sotadvārasampattavacananigghosānusārena aññāsi. Khoti avadhāraṇatthe, padapūraṇamatte vā nipāto. Tatthāvadhāraṇatthena assosieva, nāssa koci savanantarāyo ahosīti ayamattho veditabbo. Padapūraṇena pana padabyañjanasiliṭṭhatāmattameva.

Idāni yamatthaṃ brāhmaṇo pokkharasātī assosi. Taṃ pakāsento "samaṇo khalu bho gotamo"ti ādimāha. Tattha samitapāpattā samaṇoti veditabbo. Vuttaṃ hetaṃ "samitāssa honti pāpakā akusalā dhammā"tiādi. Bhagavā ca anuttarena ariyamaggena samitapāPo. Tenassa yathābhuccaguṇādhigatametaṃ nāmaṃ, yadidaṃ samaṇoti. Khalūti anussavanatthe nipāto. Bhoti brāhmaṇajātisamudāgataṃ ālapanamattaṃ. Vuttaṃpi cetaṃ "bhovādi nāma so hoti, sace hoti sakiñcano"ti.

@4 i. suṅke 5 Ma.mū. 12/434/380 mahāassapurasutta