Evaṃ vutte māṇavo "ayaṃ samaṇo gotamo attano ñātake laṭukikāsadise katvā amhe haṃsakoñcamorasame karoti, nimmānodāni jāto"ti maññamāno uttariṃ cattāro vaṇṇe dasseti.

Dāsīputtavādavaṇṇanā

[267] Nimmādetīti nimmadeti nimmāne karoti. Yannūnāhanti yadi panāhaṃ. "kaṇhāyanohamasmi bho gotamā"ti idaṃ kira vacanaṃ ambaṭṭho tikkhattuṃ mahāsaddena avoca. Kasmā avoca? kiṃ asuddhabhāvaṃ na jānātīti? āma jānāti.

Apassanto mahāsamaṇo kiṃ vakkhatīti maññamāno mānathaddhatāya avoca. Mātāpettikanti mātāpitūnaṃ santakaṃ. Nāmagottanti paṇṇattivasena nāmaṃ, paveṇivasena gottaṃ. Anussaratoti anussarantassa kulakoṭiṃ sodhentassa. Ayyaputtāti sāmino puttā. Dāsīputtoti gharadāsiyā putto. Tasmā yathā dāsena sāmino upasaṅkamitabbā, evaṃ anupasaṅkamantaṃ taṃ disvā sakyā anujagghiṃsūti dasseti.