@3 i. bhattā 4 cha.Ma., i. sinisūroti, Sī. kāsinīpuroti Puttassa rajjaṃ yāci. Rājā "nassa vasali, mama puttānaṃ antarāyaṃ icchasī"ti tajjesi. Sā punappunaṃ raho rājānaṃ paritosetvā "mahārāja musāvādo nāma na vaṭṭatī"tiādīni vatvā yācatiyeva.

Atha rājā putte āmantesi "ahaṃ tātā tumhākaṃ kaniṭṭhaṃ jantukumāraṃ disvā tassa mātu sahasā varaṃ adāsiṃ, sā puttassa rajjaṃ pariṇāmetuṃ icchati. Tumhe ṭhapetvā maṅgalahatthiṃ, maṅgalaassaṃ, maṅgalarathañca yattake icchatha, tattake hatthiassarathe gahetvā gacchatha. Mamaccayena āgantvā rajjaṃ kāreyyāthā"ti aṭṭhahi amaccehi saddhiṃ uyyojesi.

Te nānapupakāraṃ roditvā kanditvā "tāta amhākaṃ dosaṃ khamathā"ti rājānañceva rājorodhe ca khamāpetvā, "mayaṃpi bhātūhi saddhiṃ gacchāmā"ti rājānaṃ āpucchitvā nagarā nikkhantā bhaginiyo ādāya caturaṅginiyā senāya parivutā nagarā nikkhamiṃsu. "kumārā pitu accayena āgantvā rajjaṃ kāressanti, gacchāma ne upaṭṭhahāmā"ti cintetvā bahū manussā anubandhiṃsu. Paṭhamadivase yojanamattā senā ahosi, dutiye dviyojanamattā, tatiye tiyojanamattā. Kumārā mantayiṃsu "mahā ayaṃ balakāyo, sace mayaṃ kañci sāmantarājānaṃ madditvā janapadaṃ gaṇheyyāma, sopi no nappasaheyya. Kiṃ paresaṃ pīḷāya katāya, mahā ayaṃ jambudīpo, araññe nagaraṃ māpessāmā"ti himavantābhimukhā gantvā nagaravatthuṃ pariyesiṃsu.