Tasmiṃ ca samaye amhākaṃ bodhisatto brāhmaṇamahāsālakule nibbattivā kapilabrāhmaṇo nāma hutvā nikkhamma isipabbajjaṃ pabbajitvā himavantapasse pokkharaṇiyā tīre sākavanasaṇḍe paṇṇasālaṃ māpetvā vasati. So kira bhummapālaṃ nāma vijjaṃ jānāti, yāya uddhaṃ asītihatthe ākāse, heṭṭhā ca bhūmiyaṃpi guṇadosaṃ passati. Ekasmiṃ padese tiṇagumbalatā dakkhiṇāvaṭṭā pācīnābhimukhā jāyanti. Sīhabyagghādayo migasūkare, sappabiḷārā ca maṇḍūkamūsike anubandhamānā taṃ padesaṃ patvā na sakkonti te anubandhituṃ. Aññadatthuṃ tehi santajjitā

So "ayaṃ paṭhaviyā aggappadeso"ti ñatvā tattha attano paṇṇasālaṃ māpesi.

Atha te kumāre nagaravatthuṃ pariyesamāne attano vasanokāsaṃ āgate disvā pucchitvā taṃ pavattiṃ ñatvā tesu anukampaṃ janetvā avoca "imasmiṃ paṇṇasālaṭṭhāne māpitaṃ nagaraṃ jambudīpe agganagaraṃ bhavissati, ettha jātapurisesu ekeko purisasataṃpi purisasahassaṃpi abhibhavituṃ sakkhissati, ettha nagaraṃ māpetha, paṇṇasālaṭṭhāne rañño gharaṃ karotha. Imasmiṃ hi okāse ṭhatvā caṇḍālaputtopi cakkavattibalena atiseyyo"ti. Nanu bhante ayyassa vasanokāsoti? mama vasanokāsoti mā cintayittha, mayhaṃ ekapasse paṇṇasālaṃ katvā nagaraṃ māpetvā "kapilavatthun"ti nāmaṃ karothāti. Te tathā katvā tattha nivāsaṃ kappesuṃ.

Aṭṭhāmaccā "ime dārakā vayappattā, sace nesaṃ pitā santike bhaveyya, so āvāhavivāhaṃ kareyya, idāni pana amhākaṃ bhāro"ti cintetvā kumārehi saddhiṃ mantayiṃsu. Kumārā "amhākaṃ sadisā khattiyadhītaro nāma na passāma, nāpi bhaginīnaṃ sadise khattiyakumārake, asadisasampayoge ca no uppannā puttā mātito vā pitito vā aparisuddhā jātisambhedaṃ pāpuṇissanti, tasmā mayaṃ bhaginīhiyeva saddhiṃ saṃvāsaṃ rocemā"ti. Te jātisambhedabhayena jeṭṭhabhaginiṃ mātuṭṭhāne ṭhapetvā avasesāhi saṃvāsaṃ kappesuṃ.