[269] Athakho bhagavāti athakho bhagavā "sace ime māṇavakā ettha nisinnā evaṃ uccāsaddaṃ karissanti, ayaṃ kathā pariyosānaṃ na gamissati. Handa ne nissadde katvā ambaṭṭheneva saddhiṃ kathemī"ti te māṇavake etadavoca. Tattha mantavohati mantayatha. Mayā saddhiṃ paṭimantetūti mayā saha kathetu. Evaṃ vutte māṇavakā cintayiṃsu "ambaṭṭho tāva `dāsīputtosī'ti vutte puna sīsaṃ ukkhipituṃ nāsikkhi, ayaṃ kho jāti nāma dujjānā, sace aññaṃpi kiñci samaṇo gotamo `tvaṃ dāso'ti vakkhati, ko tena saddhiṃ aṭṭaṃ karissati. Ambaṭṭho attanā baddhaṃ puṭakaṃ attanāva mocetū"ti attānaṃ parimocetvā tasseva upari khipantā "sujāto ca bho gotamā"ti ādimāhaṃsu.

[270] Sahadhammikoti sahetuko sakāraṇo. Akāmāpi byākātabboti attanā anicchantenapi byākaritabbo, avassaṃ vissajjetabboti attho. Aññena vā aññaṃ paṭicarissasīti aññena vacanena aññaṃ vacanaṃ paṭicarissasi ajjhottharissasi, paṭicchādessasīti attho. Yo hi "kiṃ gotto tvan"ti evaṃ puṭṭho "ahaṃ tayo vede jānāmī"ti ādīni vadati, ayaṃ aññena aññaṃ paṭicarati nāma. Pakkamissasi vāti pucchitaṃ pañhaṃ jānantova akathetukāmatāya uṭṭhāyāsanā gamissasi vā

tuṇhī ahosīti samaṇo gotamo maṃ sāmaṃyeva dāsīputtabhāvaṃ kathāpetukāmo, sāmaṃ kathite ca dāso nāma jātoyeva hoti. Ayaṃ pana dvikkhattuṃ codetvā tuṇhī bhavissati, tato ahaṃ parivattitvā pakkamissāmīti cintetvā tuṇhī ahosi.