Kasmā pana tāpasapabbajjā sāsanassa vināsamukhanti vuttāti? yasmā Gacchantaṃ gacchantaṃ sāsanaṃ tāpasapabbajjāvasena osakkissati. Imasmiṃ hi sāsane pabbajitvā tisso sikkhā pūretuṃ asakkontaṃ lajjino sikkhākāmā "natthi tayā saddhiṃ uposako vā pavāraṇā vā saṃghakammaṃ vā"ti jigucchitvā parivajjanti. So "dukkaraṃ khuradhārūpamaṃ sāsane paṭipattipūraṇaṃ dukkhaṃ, tāpasapabbajjā pana sukarā ceva bahujanasammatā cā"ti vibbhamitvā tāpaso hoti. Aññe taṃ disvā "kiṃ tayā katan"ti pucchanti. So "bhāriyaṃ tumhākaṃ sāsane kammaṃ, idha pana sacchandacārino mayan"ti vadati. Sopi "yadi evaṃ ahaṃpi ettheva pabbajāmī"ti tassa anusikkhanto tāpaso hoti. Evaṃ aññepi aññepīti kamena tāpasāva bahukā honti. Tesaṃ uppannakāle sāsanaṃ osakkitaṃ nāma bhavissati. Loke

Idaṃ sandhāya bhagavā tāpasapabbajjaṃ sāsanassa vināsamukhanti āha.

Kuddālapiṭakanti kandamūlaphalaggahaṇatthaṃ kuddālañceva piṭakañca. Gāmasāmantaṃ vāti vijjācaraṇasampadādīni anabhisambhuṇanto, kasikammādīhi ca jīvitaṃ nipphādetuṃ dukkhanti maññamāno bahujanakuhāpanatthaṃ gāmasāmante vā nigamasāmante vā aggisālaṃ katvā sappiteladadhimadhuphāṇitatilataṇḍulādīhi ceva nānādārūhi ca homakaraṇavasena aggiṃ paricaranto acchati.

Catudvāraṃ agāraṃ karitvāti catumukhaṃ pānāgāraṃ katvā tassa dvāre maṇḍapaṃ katvā tattha pānīyaṃ upaṭṭhapetvā āgatāgate pānīyena āpucchati. Yaṃpissa addhikā kilantā pānīyaṃ pivitvā parituṭṭhā bhattapuṭaṃ vā taṇḍulādīni vā denti, taṃ sabbaṃ gahetvā ambilayāguādīni katvā bahutaraṃ āmisasaṅgahaṇatthaṃ kesañci annaṃ deti, kesañci bhattapacanabhājanādīni deti. Tehipi dinnaṃ āmisaṃ vā pubbannāparannādīni vā gaṇhāti, tāni vaḍḍhiyā payojeti. Evaṃ vaḍḍhamānavibhavo gomahiṃsadāsīdāsapariggahaṃ karoti, mahantaṃ kuṭumbaṃ saṇṭhapeti. Imaṃ sandhāyetaṃ vuttaṃ "catudvāraṃ agāraṃ karitvā acchatī"ti. "tamahaṃ yathāsatti yathābalaṃ paṭipūjessāmī"ti idaṃ panassa paṭipattimukhaṃ. Iminā hi mukhena so evaṃ paṭipajjatīti. Ettāvatā cabhagavatā sabbāpi tāpasapabbajjā niddiṭṭhā honti.