Ye "dantehi ubbāṭetvā khādanaṃ nāma dukkhaṃ pabbajitassā"ti leḍḍudaṇḍādīhi paharitvā patitaphalāni paribhuñjanti, te pavattaphalabhojanā nāma.

Ye pana "leḍḍudaṇḍādīhi pātetvā paribhogo nāma asāruppo pabbajitassā"ti sayaṃ patitāneva pupphaphalapaṇḍupalāsādīni khādantā yāpenti, te paṇḍupalāsikā nāma.

Te tividhā ukkaṭṭhamajjhimamudukavasena. Tattha ye nisinnaṭṭhānato anuṭṭhāya hatthena pāpuṇaṭṭhāneyeva patitaṃ gahetvā khādanti, te ukkaṭṭhā. Ye ekarukkhato aññaṃ rukkhaṃ na gacchanti, te majjhimā. Ye taṃ taṃ rukkhamūlaṃ gantvā pariyesitvā khādanti, te mudukā.

Imā pana aṭṭhapi tāpasapabbajjā imāhi catūhiyeva saṅgahaṃ gacchanti. Kathaṃ? etāsu hi saputtabhariyā ca uñchācariyā ca agāraṃ bhajanti. Anaggipakkikā Ca asāmapākā ca agyāgāraṃ bhajanti. Ayamuṭṭhikā ca dantavakkalikā ca kandamūlaphalabhojanaṃ bhajanti. Pavattaphalabhojanā ca paṇḍupalāsikā ca pavattaphalabhojanaṃ bhajanti. Tena vuttaṃ "ettāvatā ca bhagavatā sabbāpi tāpasapabbajjā niddiṭṭhā hontī"ti.