[284] Idāni ayañca ambaṭṭho, ācariyo cassa mante nissāya atimānino. Tena tesaṃ mantanissitamānanimmaddanatthaṃ uttariṃ desanaṃ vaḍḍhento "taṃ kiṃ maññasi ambaṭṭha, idha rājā"ti ādimāha. Tattha rathūpatthareti rathamhi rañño ṭhānatthaṃ attharitvā sajjitappadese. Uggehi vāti uggatuggatehi vā amaccehi. Rājaññehīti anabhisittakumārehi. Kiñci deva mantananti asukasmiṃ padese taḷākaṃ vā mātikaṃ vā kātuṃ vaṭṭati, asukasmiṃ gāmaṃ vā nigamaṃ vā nagaraṃ vā nivesetunti evarūpaṃ pākaṭamantanaṃ. Tadeva mantananti yaṃ raññā mantitaṃ, tadeva. Tādisehiyeva sīsukkhepabhamukakhepādīhi ākārehi manteyya. Rājabhaṇitanti yathā raññā bhaṇitaṃ tassatthassa sādhanasamatthaṃ, sopi tassatthassa sādhanasamatthameva bhaṇitaṃ bhaṇatīti attho.

[285] Pavattāroti pavattayitāro. Yesanti yesaṃ santakaṃ. Mantapadanti vedasaṅkhātaṃ mantameva. Gītanti aṭṭhakādīhi dasahi porāṇakabrāhmaṇehi sarasampattivasena sajjhāyitaṃ. Pavuttanti aññesaṃ vuttaṃ, vācitanti attho. Samīhitanti samupabyuḷhaṃ rāsīkataṃ, piṇḍaṃ katvā ṭhapitanti attho. Tadanugāyantīti etarahi brāhmaṇā tantehi pubbe gītaṃ anugāyanti anusajjhāyanti. Tadanubhāsantīti taṃ anubhāsanti, idaṃ purimasseva vevacanaṃ. Bhāsitamanubhāsantīti tehi bhāsitaṃ sajjhāyitaṃ anusajñāyanti. Vācitamanuvācentīti tehi aññesaṃ vācitaṃ anuvācenti.

Seyyathīdanti te katameti attho. Aṭṭhakoti ādīni tesaṃ nāmāni. Te kira dibbena cakkhunā oloketvā parūpaghātaṃ akatvā kassapasammāsambuddhassa bhagavato pāvacanena saha saṃsanditvā mante ganthesuṃ apare pana brāhmaṇā pāṇātipātādīni pakkhipatvā tayo vede bhinditvā buddhavacanena saddhiṃ viruddhaṃ