Ninnāmetvāti nīharitvā. Anumasīti kaṭhinasūciṃ viya katvā anumajji, tathākaraṇena cettha mudubhāvo, kaṇṇasotānumasanena dīghabhāvo, nāsikasotānumasanena tanubhāvo, nalāṭacchādanena puthulabhāvo pakāsitoti veditabbo.

[289] Patimānentoti āgamento, āgamanamassa patthento udikkhantoti attho.

[290] Kathāsallāpoti kathā ca sallāpo ca, kathanapaṭikkathananti attho.

[291] Aho vatāti garahavacanametaṃ. Reti idaṃ hīḷanavasena āmantanaṃ. Paṇḍitakāti tameva jigucchanto āha. Sesapadadvayepi eseva nayo. Evarūpena kira bho puriso atthacarakenāti idaṃ "yādiso tvaṃ, edise atthacarake hitakārake sati puriso nirayaṃyeva gaccheyya, na aññatrā"ti idamatthaṃ sandhāya vadati. Āsajja āsajjāti ghaṭṭetvā ghaṭṭetvā. Amhepi evaṃ upaneyya upaneyyāti "brāhmaṇo kho pana ambaṭṭha pokkharasātī"ti ādīni vatvā evaṃ upanetvā upanetvā paṭicchannakāraṇaṃ āvikaritvā suddadāsādibhāvaṃ āropetvā avaca, tayamhā akkosāpitāti adhippāyo. Padasāyeva pavattesīti pādena paharitvā bhūmiyaṃ pātesi. Yañca so pubbe ācariyena saddhiṃ rathaṃ āruyhitvā sārathī hutvā agamāsi, taṃpissa ṭhānaṃ acchinditvā rathassa purato padasāyevassa gamanamakāsi.