4. Soṇadaṇḍasutta

[300] Evamme sutaṃ .pe. Aṅgesūti soṇadaṇḍasuttaṃ. Tatrāyamanupubbapadavaṇṇanā:- aṅgesūti aṅgā nāma aṅgapāsādikatāya evaṃ laddhavohārā jānapadino rājakumārā, tesaṃ nivāso ekopi janapado ruḷhisaddena aṅgāti vuccati, tasmiṃ aṅgesu janapade. Cārikanti idhāpi aturitacārikāceva nibaddhacārikā ca adhippetā. Tadā kira bhagavato dasasahassīlokadhātuṃ olokentassa soṇadaṇḍo brāhmaṇo ñāṇajālassa anto paññāyittha. Atha bhagavā "ayaṃ brāhmaṇo mayhaṃ ñāṇajāle paññāyati, atthi nukhvāssūpanissayo"ti vīmaṃsanto addasa "mayi tattha gate etassa antevāsino dvādasahākārehi brāhmaṇassa vaṇṇaṃ bhāsitvā mama santike āgantuṃ na dassanti. So pana tesaṃ vādaṃ bhinditvā ekūnatiṃsāyākārehi mama vaṇṇaṃ bhāsetvā maṃ upasaṅkamitvā pañhaṃ pucchissati. So pañhāvissajjanapariyosāne saraṇaṃ gamissatī"ti, disvā pañcasatabhikkhuparivāro taṃ janapadaṃ paṭipanno. Tena vuttaṃ "aṅgesu cārikaṃ caramāno .pe. Yena campā tadavasarī"ti.

Gaggarāya pokkharaṇiyā tīreti tassa campānagarassa avidūre gaggarāya nāma rājamahesiyā khaṇitattā gaggarāti laddhavohārā pokkharaṇī atthi, tassā tīre samantato nīlādipañcavaṇṇakusumapaṭimaṇḍitaṃ mahantaṃ campākavanaṃ. Tasmiṃ bhagavā kusumagandhasugandhe campākavane viharati. Taṃ sandhāya "gaggarāya pokkharaṇiyā tīre"ti vuttaṃ.

Māgadhena seniyena bimbisārenāti ettha so rājā magadhānaṃ issarattā māgadho. Mahatiyā senāya samannāgatattā seniyo. Bimbīti suvaṇṇaṃ tasmā sārasuvaṇṇasadisavaṇṇatāya bimbisāroti vuccati.