Kalyāṇavācoti ādīsu kalyāṇā sundarā parimaṇḍalapadabyañjanā vācā assāti kalyāṇavāco. Kalyāṇaṃ madhuraṃ vākkaraṇaṃ assāti kalyāṇavākkaraṇo. Vākkaraṇanti udāharaṇaghoso. Guṇaparipuṇṇabhāvena pure bhavāti porī. Pure vā bhavattā porī. Poriyā nāgarikitthiyā sukhumālattanena sadisāti porī. Tāya poriyā. Vissaṭṭhāyāti apalibuddhāya sanniddhavilambitādidosarahitāya. Aneḷagalāyāti eḷagalena virahitāya. Yassa kassaci hi kathentassa eḷā galanti, lālā vā paggharanti, kheḷaphusitāni vā nikkhamanti, tassa vācā eḷagalā nāma hoti, tabbiparitāyāti attho. Atthassa viññāpaniyāti ādimajjhapariyosānaṃ pākaṭaṃ katvā bhāsitatthassa viññāpanasamatthāya.

Jiṇṇoti jarājiṇṇatāya jiṇṇo. Vuḍḍhoti aṅgapaccaṅgānaṃ vuḍḍhibhāvamariyādaṃ patto. Mahallakoti jātimahallakatāya samannāgato. Cirakālappasutoti vuttaṃ hoti. Addhagatoti addhānaṃ gato, dve tayo rājaparivaṭṭe atītoti adhippāyo. Vayoanuppattoti pacchimavayaṃ sampatto, pacchimavayo nāma vassasatassa pacchimo tatiyo bhāgo.

Apica jiṇṇoti porāṇo, cirakālappavattakulanvayoti vuttaṃ hoti. Vuḍḍhoti sīlācārādiguṇavuḍḍhiyā yutto. Mahallakoti vibhavamahantatāya samannāgato. Addhagatoti maggapaṭipanno brāhmaṇānaṃ vattacariyādimariyādaṃ avītikkammacaraṇasīlo. Vayoanuppattoti jātivuḍḍhabhāvaṃpi antimavayaṃ anuppatto.