Na sakkā puññaṃ saṅkhātuṃ, imettamapi kenacī"ti.

Gāthāpariyosāne caturāsītipāṇasahassāni amataṃ piviṃsu.

Aparaṃpi vatthu:- rāhu kira asurindo cattāri yojanasahassāni, aṭṭha ca yojanasatāni ucco. Bāhantaramassa dvādasa yojanasatāni. Bahalantarena cha yojanasatāni. Hatthatalapādatalānaṃ puthulato tīṇi yojanasatāni. Aṅgulipabbāni paṇṇāsayojanāni. Bhamukantaraṃ paññāsayojanaṃ. Mukhaṃ dviyojanasataṃ tiyojanasatagambhīraṃ tiyojanasataparimaṇḍalaṃ. Gīvā tiyojanasataṃ. Nalāṭaṃ tiyojanasataṃ. Sīsaṃ navayojanasataṃ. So "ahaṃ uccosmi satthāraṃ onamitvā oloketuṃ na sakkhissāmī"ti cintetvā nāgacchi. So ekadivasaṃ bhagavato vaṇṇaṃ sutvā "yathā kathaṃ ca olokessāmī"ti āgato.

Atha bhagavā tassa ajjhāsayaṃ viditvā "catūsu ariyāpathesu katarena dassessāmī"ti cintetvā "ṭhitako nāma nīcopi ucco viya paññāyati, nipanno panassa attānaṃ dassessāmiṃ"ti "ānanda gandhakuṭipariveṇe mañcakaṃ paññāpehī"ti vatvā tattha sīhaseyyaṃ kappesi. Rāhu āgantvā nipannaṃ bhagavantaṃ gīvaṃ unnāmetvā nabhamajjhe puṇṇacandaṃ viya ullokesi. "kimidaṃ asurindā"ti ca vutte