@3 cha.Ma. mīyamāno, Sī. miyyamāno 4 ka. passaddhakāyacitto

[314] Etadavocāti imesu brāhmaṇesu evaṃ ekappahāreneva viravantesu "ayaṃ kathā pariyosānaṃ na gamissati, handa ne nissadde katvā soṇadaṇḍeneva saddhiṃ kathemī"ti cintetvā etaṃ "sace kho tumhākan"ti ādikaṃ vacanamavoca.

[315-316] Sahadhammenāti sakāraṇena. Samasamoti ṭhapetvā ekadesasamattaṃ samabhāvena samo, sabbākārena samoti attho. Ahamassa mātāpitaro jānāmīti bhaginiyā puttassa mātāpitaro kiṃ na jānissati, kulakoṭiparidīpanaṃ sandhāyeva vadati. Musāpi bhāseyyāti atthabhañjakaṃ musāvādaṃ katheyya. Kiṃ vaṇṇo karissatīti abbhantare guṇe asati kiṃ karissati, kimassa barāhmaṇabhāvaṃ rakkhituṃ sakkhissatīti attho. Athāpi siyā puna "pakatisīle ṭhitassa brāhmaṇabhāvaṃ sādhetī"ti evaṃpi sīlameva sādhessati, tasmiṃ hissa asati brāhmaṇabhāvo nāhosīti sammohamattaṃ vaṇṇādayo. Idaṃ pana sutvā te brāhmaṇā "sabhāvaṃ ācariyo āha, akāraṇāva mayaṃ ujjhāyimhā"ti tuṇhī ahesuṃ.

Sīlapaññākathāvaṇṇanā