[382] Ekaccaṃ tapassiṃ lūkhājīvinti ādīsu idhekacco acelakapabbajjāditapanissitattā tapassī "lūkhena jīvitaṃ kappessāmī"ti tiṇagomayādibhakkhanādīhi nānappakārehi attānaṃ kilameti, appapuññatāya ca sukhena jīvitavuttimeva na labhati, so tīṇi duccaritāni pūretvā niraye nibbattati.

Aparo tādisaṃ tapaṃ nissitopi puññavā hoti, labhati lābhasakkakaraṃ. So "nadāni mayā sadiso atthī"ti attānaṃ ucce ṭhāne sambhāvetvā "bhiyyoso mattāya lābhaṃ uppādessāmī"ti anesanāvasena tīṇi duccaritāni pūretvā niraye nibbattati. ime dve sandhāya paṭhamanayo vutto.

Aparo tapanissitakopi lūkhājīvī appapuñño hoti, na labhati sukhena jīvitavuttiṃ. So "mayhaṃ pubbepi akatapuññatāya sukhajīvikā nuppajjati, handadāni puññāni karomī"ti tīṇi sucaritāni pūretvā sagge nibbattati.