Tapopakkamaniratthakatāvaṇṇanā

[397] Atha bhagavā sīlasampadādīhi vinā tesaṃ tapopakkamānaṃ niratthakattaṃ dassento "acelako cepi kassapa hotī"ti ādimāha. Tattha ārakā cāti dūreyeva. Averanti dosaveravirahitaṃ. Abyāpajjanti domanassabyāpajjavirahitaṃ.

[398] Dukkaraṃ bho gotamāti idaṃ kassapo "mayaṃ pubbe ettakamattaṃ sāmaññañca brahmaññañcāti vicarāma, tumhe pana aññaṃyeva sāmaññañca brahmaññañca vadathā"ti dīpento āha. Pakati kho esāti pakati kathā esā. Imāya ca kassapa mattāyāti "kassapa yadi iminā pamāṇena evaṃ parittakena paṭipattikkamena sāmaññaṃ vā brahmaññaṃ vā dukkaraṃ sudukkaraṃ nāma abhavissa, tato netaṃ abhavissa kallaṃ vacanāya dukkaraṃ sāmaññaṃ dukkaraṃ brahmaññanti ayamettha padasambandhena saddhiṃ attho. Etena nayena sabbattha padasambandho veditabbo.