Imasmiṃ panokāse ṭhatvā sīhanādā samodhānetabbā. Ekaccaṃ tapassiṃ niraye nibbattaṃ passāmīti hi bhagavato eko sīhanādo. Aparaṃ sagge nibbattaṃ passāmīti eko. Akusaladhammappahāne ahameva seṭṭhoti eko. Kusaladhammasamādānepi ahameva seṭṭhoti eko. Akusaladhammappahāne mayhameva sāvakasaṃgho seṭṭhoti eko. Kusaladhammasamādānepi mayhameva sāvakasaṃgho seṭṭhoti eko. Sīlena mayhaṃ sadiso natthīti eko. Viriyena mayhaṃ sadiso natthīti eko. Paññāya mayhaṃ sadiso natthīti eko. Vimuttiyā mayhaṃ sadiso natthīti eko. Sīhanādaṃ nadanto parisamajjhe nisīditvā nadāmīti eko. Visārado hutvā nadāmīti eko. Pañhaṃ maṃ pucchantīti eko. Pañhaṃ puṭṭho vissajjemīti eko. Vissajjanena parassa cittaṃ ārādhemīti eko. Sutvā sotabbaṃ maññantīti eko. Sutvā me pasīdantīti eko. Pasannā pasannākāraṃ karontīti eko. Yaṃ paṭipattiṃ desemi, tathattāya paṭipajjantīti eko. Paṭipattiyā ca maṃ ārādhentīti eko. Iti purimānaṃ dasannaṃ ekekassa "parisāsu ca nadatī"ti ādayo dasa dasa parivāRā. Evante dasa purimānaṃ dasannaṃ parivāravasena sataṃ purimā ca dasāti dasādhikaṃ sīhanādasataṃ hoti. Ito aññasmiṃ pana sutte ettakā sīhanādā dullabhā, tenidaṃ suttaṃ mahāsīhanādanti vuccati.

Titthiyaparivāsakathāvaṇṇanā

[404] Iti bhagavā "sīhanādaṃ kho samaṇo gotamo nadati, tañca kho suññāgāre nadatī"ti evaṃ vādānuvādaṃ paṭisedhetvā idāni parisati naditapubbaṃ puna sīhanādaṃ dassento "ekamidāhan"ti ādimāha.