Kathaṃ nikāyavasena pañcavidhaṃ? sabbameva cetaṃ dīghanikāyo majjhimanikāyo saṃyuttanikāyo aṅguttaranikāyo khuddakanikāyoti pañcappabhedaṃ hoti. Tattha katamo dīghanikāyo? tivaggasaṅgahāni brahmajālādīni catuttiṃsa suttāni.

Catuttiṃseva suttantā tivaggo yassa saṅgaho,

esa dīghanikāyoti paṭhamo anulomikoti.

Kasamā panesa dīghanikāyoti vuccati? dīghappamāṇānaṃ suttānaṃ samūhato Nivāsato ca. Samūhanivāsā hi nikāyoti vuccanti. "nāhaṃ bhikkhave aññaṃ ekanikāyaṃpi samanupassāmi evaṃ cittaṃ yathayidaṃ bhikkhave tiracchānagatā pāṇā, poṇikanikāyo cikkhallikanikāyo"ti evamādīni cettha sādhakāni sāsanato lokato ca. Evaṃ sesānaṃpi nikāyabhāve vacanattho veditabbo.