[450-453] Tato therena "ariyassa sīlakkhandhassā"ti tesu dassitesu puna "katamo pana so bho ānanda ariyo sīlakkhandho"ti ekekaṃ pucchi. Theropissa buddhuppādaṃ dassetvā tantidhammaṃ dassento anukkamena bhagavatā vuttanayeneva sabbaṃ vissajjesi. Tattha atthi cevettha uttariṃ karaṇīyanti ettha bhagavato sāsane na sīlameva sāro, kevalañcetaṃ patiṭṭhāmattameva hoti. Ito uttariṃ pana aññaṃpi kattabbaṃ atthiyevāti dasseti. Ito bahiddhāti buddhasāsanato bahiddhā.

Samādhikkhandhavaṇṇanā

[454] Kathañca māṇava bhikkhu indriyesu guttadvāro hotīti idamāyasmā ānando "katamo pana so bho ānanda ariyo samādhikkhandho"ti evaṃ samādhikkhandhaṃ puṭṭhopi ye te "sīlasampanno indriyesu guttadvāro satisampajaññena samannāgato santuṭṭho"ti evaṃ sīlānantaraṃ indriyasaṃvarādayo sīlasamādhīnaṃ antare ubhinnaṃpi upakārakadhammā uddiṭṭhā, te niddisitvā samādhikkhandhaṃ dassetukāmo ārabhi. Ettha ca rūpajjhānāneva āgatāni, na arūpajjhānāni, ānetvā pana dīpetabbāni. Catutthajṇānena hi asaṅgahitā arūpasamāpatti nāma natthiyeva.

[471-480] Atthi cevettha uttari karaṇīyanti ettha bhagavato sāsane na cittekaggatāmattakeneva pariyosānappatti nāma atthi, itopi uttari puna aññaṃ kātabbaṃ atthiyevāti dasseti. Natthi cevettha uttarikaraṇīyanti ettha bhagavato sāsane ito uttari kātabbaṃ nāma natthiyeva, arahattapariyosānaṃ hi bhagavato sāsananti dasseti. Sesaṃ sabbattha uttānatthamevāti.