[525] "niyyantīti vāseṭṭha vadesī"ti bhagavā tikkhattuṃ vacībhedaṃ kāretvā paṭiññaṃ kārāpesi. Kasmā? titthiyā hi paṭijānitvā pacchā niggayhamānā avajānanti. So tathā kātuṃ na sakkhissatīti.

[527-529] Teva tevijjāti te tevijjā. Vakāro āgamasandhimattaṃ. Andhaveṇīti andhapaveṇī, ekena cakkhumatā gahitayaṭṭhiyā koṭiṃ eko andho gaṇhāti, taṃ andhaṃ añño, taṃ aññoti evaṃ paṇṇāsasaṭṭhi andhā paṭipāṭiyā ghaṭitā andhaveṇīti vuccanti. Paraṃparasaṃsattāti aññamaññaṃ saṃsattā, yaṭṭhigāhakenapi cakkhumatā virahitāti attho. Eko kira dhutto andhagaṇaṃ disvā "amukasmiṃ nāma gāme khajjabhojjaṃ sulabhan"ti ussāhetvā "tenahi tattha no sāmi nehi, idaṃ nāma te demā"ti vutte, lañcaṃ gahetvā antarāmagge maggā okkamma mahantaṃ gacchaṃ anuparigantvā purimassa hatthena pacchimassa kacchaṃ gaṇhāpetvā "kiñci kammaṃ atthi, gacchatha tāva tumhe"ti vatvā palāyi, te divasaṃpi gantavā maggaṃ avindamānā "kuhiṃ no cakkhumā, kuhiṃ maggo"ti paridevitvā maggaṃ avindamānā tattheva mariṃsu. Te sandhāya vuttaṃ `paraṃparasaṃsattā"ti. Purimopīti purimesu dasasu brāhmaṇesu ekopi. Majjhimopīti majjhimesu ācariyapācariyesu ekopi. Pacchimopīti idāni tevijjesu brāhmaṇesu ekopi. Hassakaṃyevāti hasitabbaṃyeva. Nāmakaṃyevāti lāmakaṃyeva. Tadetaṃ atthābhāvena rittakaṃ, rittakattāyeva tucchakaṃ.

[530] Idāni brahmā tāva tiṭṭhatu, yo tevijjehi brāhmaṇehi na diṭṭhapubbo. Yepi candimasuriye tevijjā passanti, tesampi sahabyatāya maggaṃ desetuṃ nappahontīti dassanatthaṃ "taṃ kiṃ maññasī"ti ādimāha.