Sutanti ayaṃ sutasaddo saupasaggo ca anupasaggo ca gamanavissutakilinnaupacitānuyogasotaviññeyyasotadvārānusāra- viññātādianekatthappabhedo. Tathā hissa "senāya pasuto"ti ādīsu gacchantoti attho. "sutadhammassa passato"ti ādīsu vissutadhammassāti attho. "avassutā avassutassā"ti ādīsu kilinnā kilinnassāti attho. "tumhehi puññaṃ pasutaṃ anappakan"ti ādīsu upacitanti attho. "ye jhānapasutā dhīrā"ti ādīsu jhānānuyuttāti attho. "diṭṭhaṃ sutaṃ mutan"ti ādīsu sotaviññeyyanti attho. "sutadharo sutasanniccayo"ti ādīsu sotadvārānusāraviññātadharoti attho. Idha panassa sotadvārānusārena upadhāritanti vā upadhāraṇanti vāti attho. Mesaddassa hi mayāti atthe sati "evaṃ mayā sutaṃ sotadvārānusārena upadhāritan"ti yujjati. Mamāti atthe sati "evaṃ mama sutaṃ mama sotadvārānusārena upadhāraṇan"ti yujjati.

Evametesu tīsu padesu evanti sotaviññāṇādiviññāṇakiccanidassanaṃ. Meti vuttaviññāṇasamaṅgipuggalanidassanaṃ. Sutanti assavanabhāvapaṭikkhepato anūnānādhikāviparītaggahaṇanidassanaṃ tathā evanti tassā sotadvārānusārena pavattāya viññāṇavīthiyā nānappakārena ārammaṇe pavattibhāvappakāsanaṃ. Meti attappakāsanaṃ. Sutanti dhammappakāsanaṃ. Ayaṃ hettha saṅkhepo "nānappakārena ārammaṇe pavattāya viññāṇavīthiyā mayā na aññaṃ kataṃ, idaṃ pana kataṃ "ayaṃ dhammo suto"ti.

Tathā evanti niddisitabbadhammappakāsanaṃ. Meti puggalappakāsanaṃ. Sutanti puggalakiccappakāsanaṃ. Idaṃ vuttaṃ hoti "yaṃ suttaṃ niddisissāmi, taṃ mayā evaṃ sutan"ti.