Addhānamaggapaṭipanno hotīti addhānasaṅkhātaṃ maggaṃ paṭipanno hoti, "dīghamaggan"ti attho. Addhānagamanasamayassa hi vibhaṅge "aḍḍhayojanaṃ gamissāmīti bhuñjitabban"ti ādivacanato aḍḍhayojanaṃpi addhānamaggo hoti. Rājagahato pana nālandā yojanameva.

Mahatā bhikkhusaṃghena saddhinti mahatāti guṇamahattenapi mahatā, saṅkhyāmahattenapi mahatā. So hi bhikkhusaṃgho guṇehipi mahā ahosi appicchatādiguṇasamannāgatattā. Saṅkhāyapi mahā pañcasatasaṅkhyattā. Saṅkhāyapī mahā pañcasatasaṅkhyattā. Bhikkhūnaṃ saṃgho bhikkhusaṃgho, tena bhikkhusaṃghena. Diṭṭhisīlasāmaññasaṅghātasaṅkhātena samaṇagaṇenāti attho. Sddhinti ekato.

Pañcamattehi bhikkhusatehīti pañca mattā etesanti pañcamattāni. Mattāti pamāṇaṃ vuccati, tasmā yathā "bhojane mattaññū"ti vutte "bhojane mattaṃ jānāti pamāṇaṃ jānātī"ti attho hoti, evamidhāpi "tesaṃ bhikkhusatānaṃ pañcamattā pañcapamāṇan"ti evamattho daṭṭhabbo. Bhikkhūnaṃ satāni bhikkhusatāni, tehi pañcamattehi bhikkhusatehi.

Suppiyopi kho paribbājakoti suppiyoti tassa nāmaṃ. Pikāro maggapaṭipannasabhāgatāya puggalasampiṇḍanattho. Khokāro padasandhikaro byañjanasiliṭṭhatāvasena vutto. Paribbājakoti sañjayassa antevāsī channaparibbājako. Idaṃ vuttaṃ hoti "yadā bhagavā taṃ addhānamaggaṃ paṭipanno, tadā suppiyopi paribbājako maggapaṭipanno ahosī"ti, atītakālattho hi ettha hotisaddo.