te dīgharattaṃ socanti hīnakāyūpagā narā"ti.

Ādīsu hi satto "māṇavo"ti vutto. "māṇavehipi samāgacchanti katakammehipi akatakammehipi"ti ādīsu coro māṇavoti vutto. "ambaṭṭho māṇavo, maṇḍabyo māṇavo"ti ādīsu taruṇo "māṇavo"ti vutto. Idhāpi ayamevattho. Idaṃ vuttaṃ hoti "brahmadattena nāma taruṇantevāsinā saddhin"ti

tatrāti tasmiṃ addhānamagge, tesu vā dvīsu janesu. Sudanti nipātamattaṃ. Anekapariyāyenāti pariyāyasaddo tāva vāradesanākāraṇesu vattati. "kassa nu kho ānanda ajja pariyāyo bhikkhuniyo ovaditun"ti ādīsu hi vāre pariyāyasaddo vattati. "madhupiṇḍikapariyāyotveva naṃ dhārehī"ti ādīsu desanāyaṃ. "imināpi kho te rājañña pariyāyena evaṃ hotū"ti ādīsu kāraṇe. Svāyamidhāpi kāraṇe vattati, tasmā ayamettha attho "anekavidhena kāraṇenā"ti, "bahūhi kāraṇehī"ti vutti hoti.

Buddhassa avaṇṇaṃ bhāsatīti avaṇṇavirahitassa aparimāṇavaṇṇasamannāgatatsāpi buddhassa bhagavato "yaṃ loke jātivuḍḍhesu kattabbaṃ abhivādanādisāmīcikammaṃ `sāmaggīraso'ti vuccati, taṃ samaṇassa gotamassa natthi, tasmā arasarūpo samaṇo gotamo, nibbhogo, akiriyavādo, ucchedavādo, jegucchī, venayiko, tapassī, apagabbho. Natthi samaṇassa gotamassa uttarimanussadhammo alamariyañāṇadassanaviseso, takkapariyāhataṃ samaṇo gotamo dhammaṃ deseti vīmaṃsānucaritaṃ sayaṃpaṭibhāṇaṃ. Samaṇo gotamo na sabbaññū, na lokavidū, na anuttaro, na aggapuggalo"ti evaṃ taṃ taṃ akāraṇameva kāraṇanti vatvā tathā tathā avaṇṇaṃ dosaṃ nindaṃ bhāsati.