Tattha vaṇṇanti vaṇṇasaddo saṇṭhānajātirūpāyatanakāraṇapamāṇaguṇapasaṃsādīsu dissati. Tattha "mahantaṃ sapparājavaṇṇaṃ abhinimminitvā"ti ādīsu saṇṭhānaṃ

"na harāmi na bhañjāmi ārā siṅghāmi vārijaṃ,

atha kena nu vaṇṇena gandhatthenoti vuccatī"ti ādīsu kāraṇaṃ. "tayo pattassa vaṇṇā"ti ādīsu pamāṇaṃ. "kadā saññuḷhā pana te gahapati ime samaṇassa gotamassa vaṇṇā"ti ādīsu guṇo. "vaṇṇārahassa vaṇṇaṃ bhāsatī"ti ādīsu pasaṃsā. Idha guṇopi pasaṃsāpi. Ayaṃ kira taṃ taṃ bhūtameva kāraṇaṃ apadisanto anekapariyāyena ratanattayassa guṇūpasañhitaṃ pasaṃsaṃ abhāsi. Tattha "itipi so bhagavā arahaṃ sammāsambuddho"ti ādinā nayena "ye bhikkhave buddhe pasannā, agge te pasannā"ti ādinā "ekapuggalo bhikkhave loke uppajmāno uppajjati .pe. Asamo asamasamo"ti ādinā ca nayena buddhassa vaṇṇo veditabbo. "svākkhāto bhagavatā dhammo"ti ca "ālayasamugghāto vaṭṭūpacchedo"ti ca "ye bhikkhave ariye aṭṭhaṅgike magge pasannā, agge te pasannā"ti ca evamādīhi nayehi dhammassa vaṇṇo veditabbo. "supaṭipanno bhagavato sāvakasaṃgho"ti ca "ye bhikkhave saṃghe pasannā, agge te pasannā"ti ca evamādīhi pana nayehi saṃghassa vaṇṇo veditabbo. Pahontena pana dhammakathikena pañcanikāye navaṅgaṃ satthusāsanaṃ caturāsītidhammakkhandhasahassāni ogāhitvā buddhādīnaṃ vaṇṇo pakāsetabbo. Imasmiṃ hi ṭhāne buddhādīnaṃ guṇe pakāsento atitthena pakkhanto dhammakathikoti na sakkā vattuṃ. Īdisesu hi ṭhānesu dhammakathikassa thāmo veditabbo. Brahmadatto pana māṇavo anussavādimattasaṃvaḍḍhitena attano thāmena ratanattayassa vaṇṇaṃ bhāsati.