Ujuvipaccanīkavādāti īsakaṃpi apariharitvā ujumeva vividhapaccanīkavādā, anekavāraṃ viruddhavādāeva hutvāti attho. Ācariyena hi ratanattayassa avaṇṇe bhāsite antevāsī vaṇṇaṃ bhāsati, puna itaro avaṇṇaṃ, itaro vaṇṇanti evaṃ ācariyo sālaphalake visarukkhaāṇiṃ ākoṭayamāno viya punappunaṃ ratanattayassa avaṇṇaṃ bhāsati. antevāsī pana suvaṇṇarajatamaṇimayāya āṇiyā taṃ āṇiṃ paṭibāhayamāno viya punappunaṃ ratanattayassa vaṇṇaṃ bhāsati. Tena vuttaṃ "ujuvipaccanīkavādā"ti.

Bhagavantaṃ piṭṭhito piṭṭhito anubandhā honti bhikkhusaṃghañcāti bhagavantañca bhikkhusaṃghañca pacchato dassanaṃ avijahantā iriyāpathānubandhanena anubandhā honti, sīsānulokino hutvā anuggatā hontīti attho.

Kasmā pana bhagavā taṃ addhānaṃ paṭipanno, kasmā ca suppiyo anubandho, kasmā ca so ratanattayassa avaṇṇaṃ bhāsatīti? bhagavā tāva tasmiṃ kāle rājagahaparivattakesu aṭṭhārasasu mahāvihāresu aññatarasmiṃ vasitvā pātova sarīrapaṭijagganaṃ katvā bhikkhācāravelāyaṃ bhikkhusaṃghaparivuto rājagahe piṇḍāya carati. So taṃ divasaṃ bhikkhusaṃghassa sulabhapiṇḍapātaṃ katvā pacchābhattaṃ piṇḍapātapaṭikkanto bhikkhusaṃghaṃ pattacīvaraṃ gāhāpetvā "nāḷandaṃ gamissāmī"ti rājagahato nikkhamitvā taṃ addhānaṃ paṭipanno. Suppiyopi tasmiṃ kāle rājagahaparivattake aññatarasmiṃ paribbājakārāme vasitvā paribbājakaparivuto rājagahe bhikkhāya carati. Sopi taṃdivasaṃ paribbājakaparisāya sulabhabhikkhaṃ, katvā bhuttapātarāso paribbājake paribbākhajakaparikkhāraṃ gāhāpetvā "nāḷandaṃ gamissāmic "ceva bhagavato taṃ maggaṃ paṭipannabhāvaṃ ajānantova anubandho. Sace pana jāneyya, nānubandheyya. So ajānitvāva gacchanto gīvaṃ ukkhipitvā olokayamāno bhagavantaṃ addasa buddhasiriyā sobhamānaṃ rattakambalaparikkhittamiva jaṅgamakanakagirisikharaṃ.