Athevaṃ bhagavantaṃ anopamāya buddhalīlāya gacchantaṃ bhikkhū ca okkhittacakkhū santindriye santamānase uparinabhe ṭhitaṃ puṇṇacandaṃ viya bhagavantaṃyeva namassamāne disvāva paribbājako attano parisaṃ avalokesi. Sā hoti kājadaṇḍake olambetvā gahitoluggaviluggapiṭṭhakatidaṇḍamorapiñchamattikāpattapasibbakakuṇḍikādianeka- parikkhārabhārabharitā "asukassa hatthā sobhaṇā, asukassa pādā"ti evamādiniratthakavacanā mukharā vikiṇṇavācā adassanīyā apāsādikā. Tassa taṃ disvā vippaṭisāro udapādi.

Idāni tena bhagavato vaṇṇo vattabbo bhaveyya. Yasmā panesa lābhasakkārahāniyā ceva pakkhahāniyā ca niccaṃpi bhagavantaṃ usūyati. Aññatitthiyānaṃ hi yāva buddhā loke nuppajjanti, tāvadeva lābhasakkāro nibbattati, buddhuppādato pana paṭṭhāya parihīnalābhasakkārā honti, suriyuggamane khajjopanakā viya nissirīkataṃ āpajjanti. Upatissakolitānañca sañjayassa santike pabbajitakāleyeva paribbājakā mahāparisā ahesuṃ, tesu pana pakkantesu sāpi tesaṃ parisā bhinnā. Iti imehi dvīhi kāraṇehi ayaṃ paribbājako, yasmā niccaṃpi bhagavantaṃ usūyati, tasmā taṃ usūyavisuggāraṃ uggiranto ratanattayassa avaṇṇameva bhāsatīti veditabbo.

[2] Athakho bhagavā ambalaṭṭhikāyaṃ rājāgārake ekarattivāsaṃ upagañchi saddhiṃ bhikkhusaṃghenāti bhagavā tāya buddhalīlāya gacchamāno anupububena ambalaṭṭhikādvāraṃ pāpuṇitvā suriyaṃ oloketvā "akālodāni gantuṃ, atthasamīpaṃ gato suriyo"ti ambalaṭṭhikāyaṃ rājāgārake ekarattivāsaṃ upagañchi.

Tattha ambalaṭṭhikāti rañño uyyānaṃ. Tassa kira dvārasamīpe taruṇo ambarukkho atthi, taṃ "ambalaṭṭhikā"ti vadanti. Tassa avidūre bhavattā uyyānaṃpi