@4 Sī.i. ghurughurupassāsino 5 cha.Ma. guṇavaṇṇe 6 ka. vadati

[3] Sambahulānanti bahukānaṃ. Tattha vinayapariyāyena tayo janā "sambahulā"ti vuccanti, tato paraṃ saṃgho. Suttantapariyāyena pana tayo tayova, tato paṭṭhāya sambahulā. Idha suttantapariyāyena "sambahulā"ti veditabbā. Maṇḍalamāḷeti katthaci dve kaṇṇikā gahetvā haṃsavaṭṭakachannena katā kūṭāgārasālāpi "maṇḍalamāḷo"ti vuccati, katthaci ekaṃ kaṇṇikaṃ gahetvā thambhapantiṃ parikkhipitvā katā upaṭṭhānasālāpi "maṇḍalamāḷo"ti vuccati, idha pana nisīdanasālā "maṇḍalamāḷo"ti veditabbā. Sannisinnānanti nisajjanavasena. Sannipatitānanti samodhānavasena. Ayaṃ saṅkhiyadhammoti saṅkhiyā vuccati kathā, kathādhammoti attho. Udapādīti uppanno. Katamo pana soti "acchariyaṃ āvuso"ti evamādi. Tattha andhassa pabbatārohaṇaṃ viya niccaṃ na hotīti acchariyaṃ. Ayaṃ tāva saddanayo. Ayaṃ pana aṭṭhakathānayo:- accharāyogganti acchariyaṃ, accharaṃ paharituṃ yuttanti attho. Abhūtapubbaṃ bhūtanti abbhūtaṃ. Ubhayampetaṃ vimhayasseva adhivacanaṃ. Yāvañcidanti yāva ca idaṃ. Tena supaṭividitatāya appameyyataṃ dasseti.

Tena bhagavatā jānatā .pe. Supaṭividitāti etthāyaṃ saṅkhepattho:- yo so bhagavā samatiṃsa pāramiyo pūretvā sabbakilese bhañjitvā anuttaraṃ sammāsambodhiṃ abhisambuddho, tena bhagavatā tesaṃ tesaṃ sattānaṃ āsayānusayaṃ jānatā, hatthatale ṭhapitaṃ āmalakaṃ viya sabbaṃ ñeyyadhammaṃ passatā.