TIPITAKA Volume 9 : PALI ROMAN Sutta Pitaka Vol 1 : Sutta. Tī. Sī Mahāsīhanādasuttaṃ aṭṭhamaṃ

[260] Evamme sutaṃ . ekaṃ samayaṃ bhagavā ujuññāyaṃ viharati kaṇṇakathale migadāye . athakho acelo kassapo yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ aṭṭhāsi . ekamantaṃ ṭhito kho acelo kassapo bhagavantaṃ etadavoca sutametaṃ bho gotama samaṇo gotamo sabbantapaṃ garahati sabbantapassiṃ lūkhājīviṃ ekaṃsena upakkosati upavadatīti ye te bho gotama evamāhaṃsu samaṇo gotamo sabbantapaṃ garahati sabbantapassiṃ lūkhājīviṃ ekaṃsena upakkosati upavadatīti kacci te bhoto gotamassa vuttavādino na ca bhavantaṃ gotamaṃ abhūtena abbhācikkhanti dhammassa ca anudhammaṃ byākaronti na ca koci sahadhammiko vādānuvādo gārayhaṃ ṭhānaṃ āgacchati anabbhakkhātukāmā hi mayaṃ bhavantaṃ gotamanti. {260.1} Ye te kassapa evamāhaṃsu samaṇo gotamo sabbantapaṃ garahati sabbantapassiṃ lūkhājīviṃ ekaṃsena upakkosati upavadatīti na me te vuttavādino abbhācikkhanti na ca maṃ te asatā abhūtena. Idhāhaṃ kassapa ekaccaṃ tapassiṃ lūkhājīviṃ passāmi dibbena cakkhunā visuddhena atikkantamānusakena kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannaṃ idha panāhaṃ kassapa ekaccaṃ tapassiṃ lūkhājīviṃ passāmi dibbena cakkhunā Visuddhena atikkantamānusakena kāyassa bhedā paraṃ maraṇā sugatiṃ saggaṃ lokaṃ upapannaṃ. {260.2} Idha panāhaṃ kassapa ekaccaṃ tapassiṃ appadukkhavihāriṃ passāmi dibbena cakkhunā visuddhena atikkantamānusakena kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannaṃ. Idha panāhaṃ kassapa ekaccaṃ tapassiṃ appadukkhavihāriṃ passāmi dibbena cakkhunā visuddhena atikkantamānusakena kāyassa bhedā paraṃ maraṇā sugatiṃ saggaṃ lokaṃ upapannaṃ . sohaṃ kassapa imesaṃ tapassīnaṃ evaṃ āgatiñca gatiñca cutiñca upapattiñca yathābhūtaṃ pajānāmi sohaṃ kiṃ sabbantapaṃ garahissāmi sabbantapassiṃ lūkhājīviṃ ekaṃsena upakkosissāmi upavadissāmi.