๗. นวกรรมิกสูตร

Ekaṃ samayaṃ bhagavā kosalesu viharati aññatarasmiṃ @Footnote: 1 Po. Ma. Yu. bahulena. 2 Ma. Yu. save. Vanasaṇḍe . tena kho pana samayena navakammikabhāradvājo brāhmaṇo tasmiṃ vanasaṇḍe kammantaṃ kārāpeti . addasā kho navakammikabhāradvājo brāhmaṇo bhagavantaṃ aññatarasmiṃ sālarukkhamūle nisinnaṃ pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā . Disvānassa etadahosi ahaṃ kho imasmiṃ vanasaṇḍe kammantaṃ kārāpento ramāmi ayaṃ samaṇopi 1- kiṃ kārāpento ramatīti.

Atha kho navakammikabhāradvājo brāhmaṇo yena bhagavā tenupasaṅkami upasaṅkamitvā bhagavantaṃ gāthāya ajjhabhāsi ke nu kammantā kayiranti bhikkhu sālavane bhava yadekako araññasmiṃ ratiṃ vindati gotamoti.

Na ca me vanasmiṃ karaṇīyamatthi ucchinnamūlaṃ me vanaṃ visūkaṃ svāhaṃ vane nibbanatho visallo eko rame aratiṃ vippahāyāti.

Evaṃ vutte navakammikabhāradvājo brāhmaṇo bhagavantaṃ etadavoca abhikkantaṃ bho gotama abhikkantaṃ bho gotama .pe. Upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṅgatanti.