๑๑. คัคคราสูตร

Ekaṃ samayaṃ bhagavā campāyaṃ viharati gaggarāya pokkharaṇiyā tīre mahatā bhikkhusaṅghena saddhiṃ pañcamattehi bhikkhusatehi sattahi ca upāsakasatehi anekehi ca devatāsahassehi . tyāssudaṃ bhagavā atirocati vaṇṇena ceva yasasā ca.

Atha kho āyasmato vaṅgīsassa etadahosi ayaṃ kho bhagavā campāyaṃ viharati gaggarāya pokkharaṇiyā tīre mahatā bhikkhusaṅghena saddhiṃ pañcamattehi bhikkhusatehi sattahi ca upāsakasatehi [2]- anekehi ca devatāsahassehi tyāssudaṃ bhagavā atirocati vaṇṇena ceva yasasā ca yannūnāhaṃ bhagavantaṃ sammukhā sarūpāya gāthāya abhitthaveyyanti . atha kho āyasmā vaṅgīso uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjalimpaṇāmetvā bhagavantaṃ etadavoca paṭibhāti maṃ bhagavā paṭibhāti maṃ sugatāti . paṭibhātu taṃ vaṅgīsāti bhagavā avoca.

Atha kho āyasmā vaṅgīso bhagavantaṃ sammukhā sarūpāya gāthāya abhitthavi @Footnote: 1 Ma. Yu. anupariyeti. 2 Ma. Yu. etthantare sattahi ca upāsikāsatehi. Cando yathā vītavalāhake nabhe virocati vītamalova bhāṇumā evampi aṅgīrasa tvaṃ mahāmuni atirocasi yasasā sabbalokanti.