มหาปุริสสูตร

Sāvatthīnidānaṃ . atha kho āyasmā sārīputto yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho āyasmā sārīputto bhagavantaṃ etadavoca mahāpuriso mahāpurisoti bhante vuccati kittāvatā nu kho bhante mahāpuriso hotīti . vimuttacittattā khvāhaṃ sārīputta mahāpurisoti vadāmi avimuttacittattā no mahāpurisoti vadāmi.

Kathañca sārīputta vimuttacitto hoti . idha sārīputta bhikkhu kāye kāyānupassī viharati ātāpī sampajāno satimā vineyya loke abhijjhādomanassaṃ . tassa kāye kāyānupassino viharato cittaṃ virajjati vimuccati anupādāya āsavehi . vedanāsu citte dhammesu dhammānupassī viharati ātāpī sampajāno satimā vineyya loke abhijjhādomanassaṃ . tassa dhammesu dhammānupassino viharato cittaṃ virajjati vimuccati anupādāya āsavehi . evaṃ kho sārīputta vimuttacitto hoti . vimuttacittattā khvāhaṃ sārīputta mahāpurisoti vadāmi avimuttacittattā no mahāpurisoti vadāmīti.