เสทกสูตร ที่ ๑

Ekaṃ samayaṃ bhagavā sumbhesu viharati sedakaṃ 3- nāma sumbhānaṃ nigamo . tatra kho bhagavā bhikkhū āmantesi bhūtapubbaṃ bhikkhave caṇḍālavaṃsiko caṇḍālavaṃsaṃ ussāpetvā medakathālikaṃ antevāsiṃ āmantesi ehi tvaṃ samma medakathālike caṇḍālavaṃsaṃ abhirūhitvā mama uparikkhandhe tiṭṭhāhīti . evaṃ ācariyāti kho bhikkhave medakathālikā antavāsī caṇḍālavaṃsikassa paṭissutvā caṇḍālavaṃsaṃ abhirūhitvā ācariyassa uparikkhandhe aṭṭhāsi . atha kho bhikkhave caṇḍālavaṃsiko medakathālikaṃ antevāsiṃ etadavoca tvaṃ samma medakathālike mamaṃ rakkha ahaṃ taṃ rakkhissāmi evaṃ mayaṃ aññamaññaguttā @Footnote: 1 Ma. brahmā sahampatīti dve pāṭhā natthi. 2 Yu. atariṃsu. 3 medakanti vā pāṭho. Aññamaññarakkhitā sippāni ceva dassissāma lābhañca lacchāma sotthinā ca caṇḍālavaṃsā orohissāmāti.

Evaṃ vutte bhikkhave medakathālikā antevāsī caṇḍālavaṃsikaṃ etadavoca na kho panetaṃ ācariya evaṃ bhavissati tvaṃ ācariya attānaṃ rakkha ahaṃ attānaṃ rakkhissāmi evaṃ mayaṃ attaguttā attarakkhitā sippāni ceva dassissāma lābhañca lacchāma sotthinā ca caṇḍālavaṃsā orohissāmāti . so tattha ñāyoti bhagavā avoca yathā medakathālikā antevāsī ācariyaṃ avoca . attānaṃ bhikkhave rakkhissāmīti satipaṭṭhānaṃ sevitabbaṃ paraṃ rakkhissāmīti satipaṭṭhānaṃ sevitabbaṃ . attānaṃ bhikkhave rakkhanto paraṃ rakkhati paraṃ rakkhanto attānaṃ rakkhati.

Kathañca bhikkhave attānaṃ rakkhanto paraṃ rakkhati . Āsevanāya bhāvanāya bahulīkammena . evaṃ kho bhikkhave attānaṃ rakkhanto paraṃ rakkhati.

Kathañca bhikkhave paraṃ rakkhanto attānaṃ rakkhati . Khantiyā avihiṃsāya mettacittatāya anudayatāya . evaṃ kho bhikkhave paraṃ rakkhanto attānaṃ rakkhati.

Attānaṃ bhikkhave rakkhissāmīti satipaṭṭhānaṃ sevitabbaṃ paraṃ rakkhissāmīti satipaṭṭhānaṃ sevitabbaṃ . attānaṃ bhikkhave rakkhanto paraṃ rakkhati paraṃ rakkhanto attānaṃ rakkhatīti.