สิกขาบทที่ ๑ เรื่องพระฉัพพัคคีย์

Tena samayena buddho bhagavā āḷaviyaṃ viharati aggāḷave cetiye . tena kho pana samayena chabbaggiyā bhikkhū kosiyakārake upasaṅkamitvā evaṃ vadenti 1- bahū āvuso kosakārake pacatha amhākaṃpi dassatha mayaṃpi icchāma kosiyamissakaṃ santhataṃ kātunti . Te ujjhāyanti khīyanti vipācenti kathaṃ hi nāma samaṇā sakyaputtiyā amhe upasaṅkamitvā evaṃ vakkhanti bahū āvuso kosakārake pacatha amhākaṃpi dassatha mayaṃpi icchāma kosiyamissakaṃ santhataṃ kātunti amhākaṃpi alābhā amhākaṃpi dulladdhaṃ ye mayaṃ ājīvassa hetu puttadārassa kāraṇā bahū khuddake pāṇe saṅghātaṃ āpādemāti. {74.1} Assosuṃ kho bhikkhū tesaṃ ujjhāyantānaṃ khīyantānaṃ vipācentānaṃ . ye te bhikkhū appicchā .pe. te ujjhāyanti khīyanti vipācenti kathaṃ hi nāma chabbaggiyā bhikkhū kosiyakārake upasaṅkamitvā evaṃ vakkhanti bahū āvuso kosakārake pacatha amhākaṃpi dassatha mayaṃpi icchāma kosiyamissakaṃ santhataṃ kātunti . Athakho te bhikkhū bhagavato etamatthaṃ ārocesuṃ . saccaṃ kira tumhe bhikkhave kosiyakārake upasaṅkamitvā evaṃ vadetha bahū āvuso kosakārake pacatha amhākaṃpi dassatha mayaṃpi icchāma kosiyamissakaṃ @Footnote: 1 Ma. vadanti. Santhataṃ kātunti . saccaṃ bhagavāti . vigarahi buddho bhagavā kathaṃ hi nāma tumhe moghapurisā kosiyakārake upasaṅkamitvā evaṃ vakkhatha bahū āvuso kosakārake pacatha amhākaṃpi dassatha mayaṃpi icchāma kosiyamissakaṃ santhataṃ kātunti netaṃ moghapurisā appasannānaṃ vā pasādāya pasannānaṃ vā bhiyyobhāvāya .pe. evañca pana bhikkhave imaṃ sikkhāpadaṃ uddiseyyātha {74.2} yo pana bhikkhu kosiyamissakaṃ santhataṃ kārāpeyya nissaggiyaṃ pācittiyanti.

Yo panāti yo yādiso .pe. bhikkhūti .pe. Ayaṃ imasmiṃ atthe adhippeto bhikkhūti . santhataṃ nāma santharitvā kataṃ hoti avāyimaṃ . kārāpeyyāti ekenapi kosiyaṃsunā missitvā karoti vā kārāpeti vā payoge dukkaṭaṃ paṭilābhena nissaggiyaṃ hoti nissajjitabbaṃ saṅghassa vā gaṇassa vā puggalassa vā . evañca pana bhikkhave nissajjitabbaṃ .pe. idaṃ me bhante kosiyamissakaṃ santhataṃ kārāpitaṃ nissaggiyaṃ imāhaṃ saṅghassa nissajjāmīti .pe. Dadeyyāti .pe. Dadeyyunti .pe. Āyasmato dammīti.

Attanā vippakataṃ attanā pariyosāpeti nissaggiyaṃ pācittiyaṃ . attanā vippakataṃ parehi pariyosāpeti nissaggiyaṃ pācittiyaṃ . parehi vippakataṃ attanā pariyosāpeti nissaggiyaṃ pācittiyaṃ . parehi vippakataṃ parehi pariyosāpeti nissaggiyaṃ pācittiyaṃ . aññassatthāya karoti vā kārāpeti vā āpatti Dukkaṭassa . aññena kataṃ paṭilabhitvā paribhuñjati āpatti dukkaṭassa.

Anāpatti vitānaṃ vā bhummattharaṇaṃ vā sāṇipākāraṃ vā bhisiṃ vā bimbohanaṃ vā karoti ummattakassa ādikammikassāti. Paṭhamasikkhāpadaṃ niṭṭhitaṃ. -------