กูฏสูตร ที่ ๒

111 Athakho anāthapiṇḍiko gahapati yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi ekamantaṃ nisinnaṃ kho anāthapiṇḍikaṃ gahapatiṃ bhagavā etadavoca citte gahapati byāpanne kāyakammampi byāpannaṃ hoti vacīkammampi byāpannaṃ hoti manokammampi byāpannaṃ hoti tassa byāpannakāyakammassa byāpannavacīkammassa byāpannamanokammassa na bhaddakaṃ maraṇaṃ hoti na bhaddikā kālakiriyā seyyathāpi gahapati kūṭāgāre ducchanne kūṭampi byāpannaṃ hoti gopāṇasiyopi byāpannā honti bhittipi byāpannā hoti evameva kho gahapati citte byāpanne .pe. na bhaddakaṃ maraṇaṃ hoti na bhaddikā kālakiriyā citte gahapati abyāpanne kāyakammampi abyāpannaṃ hoti vacīkammampi abyāpannaṃ hoti manokammampi abyāpannaṃ hoti tassa abyāpannakāyakammassa abyāpannavacīkammassa abyāpannamanokammassa bhaddakaṃ maraṇaṃ hoti Bhaddikā kālakiriyā seyyathāpi gahapati kūṭāgāre succhanne kūṭampi abyāpannaṃ hoti gopāṇasiyopi abyāpannā honti bhittipi abyāpannā hoti evameva kho gahapati citte abyāpanne .pe. Bhaddakaṃ maraṇaṃ hoti bhaddikā kālakiriyāti.