๑๒. จันทาเถรีคาถา

|๔๕๐.๑๒๒| ๑๒ ทุคฺคตาหํ ปุเร อาสึ วิธวา จ อปุตฺติกา วินา มิตฺเตหิ ญาตีหิ ภตฺตโจลสฺส นาธิคํ ฯ |๔๕๐.๑๒๓| ปตฺตํ ทณฺฑํ จ คณฺหิตฺวา ภิกฺขมานา กุลา กุลํ สีตุเณฺหน จ ฑยฺหนฺตี สตฺต วสฺสานิ จาริหํ ฯ |๔๕๐.๑๒๔| ภิกฺขุนึ ปุน ทิสฺวาน อนฺนปานสฺส ลาภินึ อุปสงฺกมฺม อโวจํ ปพฺพชึ อนคาริยํ ฯ |๔๕๐.๑๒๕| สา จ มํ อนุกมฺปาย ปพฺพาเชสิ ปฏาจารา ตโต มํ โอวทิตฺวาน ปรมตฺเถ นิโยชยิ ฯ |๔๕๐.๑๒๖| ตสฺสาหํ วจนํ สุตฺวา อกาสึ อนุสาสนึ อโมโฆ อยฺยาย โอวาโท เตวิชฺชมฺหิ อนาสวา ฯ จนฺทา ฯ ปญฺจกนิปาโต สมตฺโต ฯ -------------