[1491] Yassa etādisā assu amaccā purisapaṇḍitā yathā nijjhāpaye ajja ghato purisapaṇḍito. Ādittaṃ vata maṃ santaṃ ghatasittaṃva pāvakaṃ vārinā viya osiñci sabbaṃ nibbāpaye daraṃ. Abbuhi vata me sallaṃ yamāsi hadayassitaṃ yo me sokaparetassa puttasokaṃ apānudi. Sohaṃ abbūḷhasallosmi vītasoko anāvilo na socāmi na rodāmi tava sutvāna māṇava.

[1492] Evaṃ karonti sappaññā ye honti anukampakā nivattayanti sokamhā ghato jeṭṭhaṃva bhātaranti. Ghatapaṇḍitajātakaṃ soḷasamaṃ. ---------- Tassuddānaṃ daḷha kaṇha dhanañjaya saṅkhavaro rājā sattāha sasākha takkalinā dhammaṃ kukkuṭa kuṇḍali bhojanadā cakkavāka subhūri sasotthi ghato. Dasakanipātaṃ niṭṭhitaṃ. ---------