[1887] Api bhīruke api jīvitukāmike kiṃpurisī gaccha himavantaṃ tālisataggarabhojanā aññe taṃ migā ramissanti.

[1888] Te pabbatā tā ca kandarā tā ca giriguhāyo [3]- tattha taṃ apassantī kiṃpurisa kathaṃ ahaṃ kāsaṃ . Yesu pabbatesu mayaṃ ekato abhiramimhā tattha taṃ apassantī kiṃpurisa kathaṃ ahaṃ kāsaṃ . Te paṇṇasanthatā ramaṇīyā vāḷamigehi anuciṇṇā tattha taṃ apassantī kiṃpurisa kathaṃ ahaṃ kāsaṃ. Te pupphasanthatā ramaṇīyā vāḷamigehi anuciṇṇā tattha taṃ apassantī kiṃpurisa kathaṃ ahaṃ kāsaṃ . Acchā savantī girivananadiyo kusumābhikiṇṇasotāyo tattha taṃ apassantī kiṃpurisa kathaṃ ahaṃ kāsaṃ. Nīlāni himavato pabbatassa kūṭāni dassanīyāni tattha taṃ apassantī kiṃpurisa kathaṃ ahaṃ kāsaṃ. Pītāni himavato pabbatassa kūṭāni dassanīyāni tattha taṃ apassantī kiṃpurisa kathaṃ ahaṃ kāsaṃ. Tambāni himavato pabbatassa kūṭāni dassanīyāni tattha taṃ apassantī kiṃpurisa kathaṃ ahaṃ kāsaṃ. Tuṅgāni himavato pabbatassa kūṭāni dassanīyāni tattha taṃ apassantī kiṃpurisa kathaṃ ahaṃ kāsaṃ. Setāni himavato pabbatassa kūṭāni dassanīyāni tattha taṃ apassantī kiṃpurisa kathaṃ ahaṃ kāsaṃ. Citrāni himavato pabbatassa kūṭāni dassanīyāni tattha taṃ apassantī kiṃpurisa kathaṃ ahaṃ kāsaṃ. Yakkhagaṇasevite gandhamādane osadhehi sañchanne tattha taṃ apassantī kiṃpurisa kathaṃ ahaṃ kāsaṃ. Kiṃpurisasevite gandhamādane osadhehi sañchanne Tattha taṃ apassantī kiṃpurisa kathaṃ ahaṃ kāsaṃ.

[1889] Vande te (pāde) ayirabrahme yo me icchitaṃ patiṃ varākiyā amatena abhisiñci samāgatasmiṃ piyatamena.