[865] |865.1| Yo icche puriso hotuṃ jātiṃ jātiṃ punappunaṃ paradāraṃ vivajjeyya dhotapādova kaddamaṃ. |865.2| Yā icche puriso hotuṃ jātiṃ jātiṃ punappunaṃ sāmikaṃ apacāyeyya indaṃva paricārikā. |865.3| Yo icche dibbabhogañca dibbamāyuṃ yasaṃ sukhaṃ pāpāni parivajjetvā tividhaṃ dhammamācare. |865.4| Kāyena vācā manasā appamatto vicakkhaṇo attano hoti atthāya itthī vā yadivā pumā. |865.5| Yekecime manujā jīvaloke yasassino sabbasamantabhogā asaṃsayaṃ tehi pure suciṇṇaṃ kammassakāse puthu sabbasattā. |865.6| Iṅghānucintesi sayampi deva kutonidānā te imā janinda yā te imā accharasannikāsā alaṅkatā kāñcanajālachannā. Iccevaṃ pitaraṃ kaññā rucā tosesi aṅgatiṃ Muḷhassa maggamācikkhi dhammamakkhāsi subbatā.

[866] |866.1| Athāgamā brahmalokā nārado mānusiṃ pathaṃ jambūdīpaṃ avekkhanto addasa rājānamaṅgatiṃ. |866.2| Tato patiṭṭha pāsāde vedehassa purakkhato tañca disvā anuppattaṃ rucā isimavandatha.

[867] |867.1| Athāsanamhā oruyha rājā byamhitamānaso nāradaṃ paripucchanto idaṃ vacanamabravi. |867.2| Kuto nu āgacchasi devavaṇṇī obhāsayaṃ sabbadisā candimā va akkhāhi me pucchito nāmagottaṃ kathannu jānanti manussaloke.

[868] Ahañhi devato idāni emi obhāsayaṃ sabbadisā candimā va akkhāmi te pucchito nāmagottaṃ jānanti maṃ nārado kassapo cāti.