[1155] |1155.1| Athettha sīhā byagghā ca purisālū ca hatthiyo eṇeyyā pasadā ceva rohitā sarabhā migā. |1155.2| Koṭṭhasuṇā suṇopi ca tuliyā naḷasannibhā cāmarī calanī laṅghī jhāpitā makkaṭā picu. |1155.3| Kakkaṭā katamāyā ca ikkā goṇasirā bahū khaggā varāhā nakulā kāḷakettha bahutaso. |1155.4| Mahisā soṇā sigālā cappakā ca samantato ākuccā pacalākā ca citrakā cāpi dīpiyo. |1155.5| Pelakā ca vighāsādā sīhā kokanisātakā aṭṭhapādā ca morā ca bhassarā ca kukuṭṭhakā.

[1156] |1156.1| Athettha sakuṇā santi nīlakā mañjubhāṇikā modanti saha bhariyāhi aññamaññaṃ pakūjino. |1156.2| Athettha sakuṇā santi dijā mañjussarāsitā setakkhikūṭā bhadrakkhā aṇḍajā citrapekkhaṇā . |1156.3| Athettha sakuṇā santi dijā mañjussarāsitā sikhaṇḍī nīlagīvāhi aññamaññaṃ pakūjino. |1156.4| Kukkuṭṭhakā kuḷīrakā koṭṭhā pokkharasātakā kāḷaveyyā balīyakkhā kadambā suvasālikā. |1156.5| Haliddā lohitā setā athettha naḷakā bahū vāraṇā bhiṅgarājā ca kadambā suvakokilā. |1156.6| Ukkusā kururā haṃsā āṭā parivadentikā Cākahaṃsā atibalā najjuhā jīvajīvakā. |1156.7| Pārevatā ravihaṃsā cākavākā nadīcarā vāraṇābhirudā rammā ubho kālupakūjino |1156.8| athettha sakuṇā santi nānāvaṇṇā bahū dijā modanti saha bhariyāhi aññamaññaṃ pakūjino. |1156.9| Athettha sakuṇā santi nānāvaṇṇā bahū dijā sabbe mañjū nikūjanti mucalindamubhato saraṃ. |1156.10| Athettha sakuṇā santi karavīkā nāma te dijā modanti saha bhariyāhi aññamaññaṃ pakūjino. |1156.11| Athettha sakuṇā santi karavīkā nāma te dijā sabbe mañjū nikūjanti mucalindamubhato saraṃ. |1156.12| Eṇeyyā pasadākiṇṇaṃ nāgasaṃsevitaṃ vanaṃ nānālatāhi sañchannaṃ kadalimigasevitaṃ. |1156.13| Athettha sāmā bahukā nivāro varako bahu sāli akaṭṭhapāko ca ucchu tattha anappako. |1156.14| Ayaṃ ekapadī eti ujuṃ gacchati assamaṃ khuddaṃ pipāsaṃ aratiṃ tattha patto na vindati. Yattha vessantaro rājā saha puttehi sammati |1156.15| dhārento brāhmaṇavaṇṇaṃ āsadañca masañjaṭaṃ cammavāsī chamā seti jātavedaṃ namassati.